Agartala, K’lyngkot 18 :Uwei u khynnah rit uba dang lai snem shiteng u la shah pyniap dusmon ha la u jong u kpa uba la tep noh ia ka met ha ka jaka ba long khlaw hajan ka iingsah ka jong u.Kane ka jingjia kaba sngewtriem ka la jia ha ki bynta ba marjan jong ka Baldakhal kaba don pajih na ka sorbah Agartala.
Utei u longkpa uba la shah kynnoh donkti u dei u ba la tip kyrteng kum u Shyamal Das u ba la dep shah kem lypa ha ki pulit kiba la wan ialam ia u hakhmat ka iingbishar.Na ka liang ki pulit kila leit ban khlong noh ia ka met jong utei u khynnah na ka bynta ban pyndep ia ka postmortem.
Katkum ki pulit la iathuh ba ki dkhot na ka tnat forensic kila iaid shakhmat na ka bynta ban pynlong ia ka jingwad bniah.Na ka liang ka SDPO ka New Capital Complex ka Paramita Pandey haba kren halor kane ka jingjia ka la ong; “Katkum ki jingtip kaba ngi la ioh, uwei u khynnah uba dang lai snem rta u la shah pyniap dusmon ha la u jong u kpa uba la tep noh ia ka met ka jong u.Hadien laikynta jong ka jingwad bniah hadien ba ngi la wan poi ha katei ka jaka, la ioh ban khlong noh ia ka metiap na kawei ka jaka ba sanium kaba hajan ka iingsah jong une u lanot.”
Na ka liang ka kmie jong utei u lanot ka la iathuh ha ki pulit ba ka la pyrshang ban tuklar bad pynsangeh ia u kurim jong ka uba don hapdeng ka jingbitar hynrei u la thombor ia ka ruh kumjuh, ong ki lad pathai khubor kiba la shim ia ka jingpynpaw jong ki bor pulit.
“Ia baroh ki jingphla la dep ban rekod, bad ia u briew uba shah kynnoh donkti la ioh ban kem noh.Hynrei, ia k daw kaba thikna halor ka jingiap jong utei u khynnah yn lah tad hadien ba la pyndep ia ka postmortem,” ong ka Pandey.Ki bynta ka khlieh jong une u khynnah ki don ia ka dak mong kaba lah ban dei ka daw kaba la wanrah ia ka jingkhlad noh.
Ia mynta hi ka jingtohkit ka shem ba une u khynnah ula shah pyniap shwa bad hadien la tep noh ia u.Na ka liang ki para marjan kila ong ba ka jingiakynad hapoh kane ka longiing ka dei kaba ju jia khah khah.
