Guwahati, Jylliew 19: Kaei kaba ka Jylla Arunachal Pradesh bad ka Sikkim ki don kajuh kaba iapher bad kiwei ki Jylla ka thain Shatei Lam Mihngi, kaba sngewphylla ka long ba ki Myntri Sorkar ha kine artylli ki Jylla, ki dei crorepati.
Ka Association for Democratic Reforms (ADR) bad ka Arunachal Pradesh Election Watch kala shem ba ki Affidavits jong baroh 12 ngut ki Myntri Sorkar kynthup u Myntri Rangbah Jylla haka Arunachal Pradesh State Assembly Elections 2024, ka paw ba kidei Crorepati.
Ha Sikkim ruh baroh 12 ngut ki Myntri kidei Crorepati.
Ka jingtip kadei katkum ka Affidavit ba la phah hashuwa ka ilekshon 2024 ha Arunachal Pradesh bad Sikkim.
Ka jingduna eh ka spah jong ki 12 ngut hapoh Arunachal Pradesh kadei T.48.33 klur katba ha Sikkim kadei T.21.72 klur.
Ha Arunachal Pradesh, u Myntri ba riewspah tam udei Pema Khandu na Mukto (ST) constituency uba don iaka spah ba kot T.332.56 klur.
U Myntri ba heh spah tam ha Sikkim udei u Nar Bahadur Dahal na Khamdong-Singtam constituency uba don T.74.10 klur.
U Myntri ba duna tam ka spah ha Arunachal Pradesh udei Gabriel Denwang Wangsu na Kanubari (ST) constituency uba don T.1.65 klur.
U Myntri ba duna tam ka spah ha Sikkim udei Bhim Hang Limboo na Yangthang constituency uba don T.1.58 klur.
5 ngut ki Myntri ha Arunachal Pradesh kila pynbna iaka spah ba ki don bad napdeng kine u Myntri Rangbah Jylla u Pema Khandu na Mukto (ST) constituency u don T.180.27 klur.
Ha Sikkim, 6 ngut ki Myntri kila pynbna iaka spah bad napdeng kine u Myntri baheh spah tam udei Nar Bahadur Dahal na Khamdong-Singtam constituency uba don T.19.01 klur.
Katba ka Sikkim kam don Myntri kynthei, ka Arunachal Pradesh ka don 1 Myntri kynthei.
