Pyni ka VPP ba ym burom ia ka riam tynrai ki Thei Khasi ba khrong pisa da ka ‘jaintapmoh’: HNLC

Shillong, Jymmang 31 : Ka Hynniewtrep National Liberation Council (HNLC) ha ka sngi U Blei kala ong ba ka jingpyndonkam ia ka “jaintapmoh” ha ka jinglum pisa u President ka Voice of the People Party (VPP) Ardent Miller Basaiawmoit ka long kum “ka jingbym burom kaba shai kdar ia ka riam tynrai bad ka dustur ki Kynthei Khasi.

Ha ka kyrwoh, u General Secretary ka HNLC Bah Sainkupar Nongtraw ula pyniapher ia ka jingkren ialap elekshon jong u Bad Ardent ha u 2024 ha Mawkar – “Ngam lah ban ai pisa ia phi. Ngan ym ai kyiad lane khawai. Nga la ong ruh ba lada ki paidbah ki jied ia nga, ngan ym ai ruh wat sha naia ka pisa jong nga bad ngan ym shim ruh wat shi naia ka pisa ba dei jong ki” – ia kaba u ong pat hadien ka “synniang pisa u paidbah hapoh ka nam “pynap borti”.

“Kane ka jingkular hakhmat u paidbah ba mynshuwa mynta kala paw kum ka kam kai da ki jingleh ba mynta” ula ong bad bynrap “Kane ka rukom leh kala poi shaduh u pud ban pyndonkam sa da ki riam tynrai kum ka “jaintapmoh” ha ka por ba lum ia ka synniang paidbah”.

Une u Nongialam ka HNLC ula bynrap “Ngi la iohsngew ruh ba u Bah Ardent ula pyndonkam ia ka kyntien “Pynap da ka Jainkyrshah hashuwa ban lum ia ka pisa, ia kaba bun ki shim ba ka dei ka jing bym burom ia ka riam tynrai ki kynthei bad ka burom jong ka kat kum ka dustur”.

Haba pynpaw ia ka jinglong kyrpang jong kane ka riam, ula ong “Ha ka imlang sahlang ki Hynniewtrep, ka jain tapmoh bad jain kyrshan kim dei ki mar ba kume kumtai. Ki dei ki dak jong ka dustur kaba la suhthied ba pyni ia ka jinglong ba kyrpang, ka burom bad ka pateng”.

“Ka jingpyndonkam ia ki kum ki tiar ban lum pisa ha ka jingpynkhih politics ka dei kaba baroh kila khmih kum ka pynpoh ia ka jingmut jong ki kat kum ka dustur bad pynhiar dor ia ka jinglong kyntang jong ki” ong u Bah Sainkupar.

U Bah Sainkupar ula ong ruh “Ka jingsngewkhia kam dei eh halor ka rukom lum pisa, hynrei ka jing pynkylla suki suki ia ki mar ba dei jong ka dustur sha ki tiar ban lum pisa ha ki rynsan politics. Ia kiba bun ki briew, kane ka pyni ia ka jingbym sngwthuh ia ka riam tynrai kiba kit ia ka jingmut ha ka khana pateng bad ka jingsngew”.

Haba buh jingkylli ia ka nongrim jong ka VPP halor ka riti ka dustur, une u Nongialam ka HNLC ula ong “Mynta kala nang shai shuh shuh ba ka VPP ka kwah ban pynlong beain ia ka Riti Dustur u Hynniewtrep, da kaba bym burom ia ka riam tynrai haba kyrshan ruh ia ka jingai jait sha u Kpa, ka jingthombor bept beit sha ka jinglong ba kyrpang bad ka riti ka dustur jong ki paid Hynniewtrep”.

“Kumno u Nongialam ula kam paidbah ban bat ia ka jinglong kyrpang bad ka riti dustur u Hynniewtrep ula pynksan pat lane shah ban pyndonkam ia ki ‘Jaintapmoh’ kum ka tiar ban lum synniang paidbah, haba nyngkong ula kyntait ia ka jingleh politics da ka pisa kat kum ka nongrim jong u?” ula buh jingkylli.

Ka HNLC kala kdew ia ka jingkhein jong ka pisa bala lum na ka jingialang ha Sohra bad ong “Kiba bun kiba syniang ki ai da ki lut T.10, T.20, T.50 bad T.100” kaba pyni ba “ïa ka jingkit kaba khia ha ka liang ka pisa tyngka ba shisha la kit ym tang da ki heh spah bad ki Nongialam Crorepati hynrei ki riew paidbah ruh kila iasaid ban im”.

“U nongialam crorepati ula pan na ki nongrep kiba duk, ki nongbylla, ki nongshong dukan madan, ki kynthei ba shong iew, bad ki nongbylla sngi ban bei tyngka ia ka politics jong u kam dei satia ka jinglen lade u paidbah. Ka dei ka jingshim kabu ia ka jingsngew kaba la pynkylla dur kumka sain pyrthei u pakdbah” ong ka kyrwoh.