Buh jingkylli ia ka nongrim shah thngan u Bah Ardent ba 221 kynta
Shillong, Jymmang 31 : Ka Hynniewtrep National Liberation Council (HNLC) ha ka sngi U Blei kala kynnoh ia ka Voice of the People Party (VPP) ba kala kynran dien na ka jingdawa bala slem jong ka halor ka State Reservation Policy na ka bynta ka “jingleh politics da kaba khein jingkhein” ban rung khlieh sha ri-lum Garo hashuwa ka elekshon 2028.
Ha ka kyrwoh, u General Secretary ka HNLC Bah Sainkupar Nongtraw ula ong “ba ka seng kala peit thuh bha ia ka jinglehkai politics bad ki buit jong ka VPP”.
“Ka VPP ka dawa ia ka All-Party Meeting halor ka Reservation Policy da ki snem bad, haba ka Sorkar kala pynurlong, kila shong iing pynban” ula ong bad bynrap “Ka daw hi ka long kaba shai, ‘ka jingleh politics da kaba khein jingkhein’.
Kumba don ba ong, u Nongialam ka HNLC ula bynrap “ Kumba la ong, u briew um lah ban tbeh ding ha ka por mynsngi bad wan phai ha ka por mynmiet ban leh kum u nongpynlip ding. Kane ka dei thik kaba ka VPP ka leh, aiding ia kane ka kam (Reservation Policy) hakhmat u paidbah bad mynta kala kynran dien pat ynda poi ka por ban shim ia ka jingkitkhlieh”.
Ka HNLC ka pyniasnoh ia ka nongrim jong ka VPP sha ka jingthmu iakhun elekshon ha ri-lum Garo.
“Katba ka party ka dang pyniar ia ka jylli ha ri-lum Garo hashuwa u 2028, ka sheptieng ba ka jingshim ia ka nongrim kaba tyngeh halor ka Reservation Policy ka lah ban pynsniew ia ki lad ban jop ia ka elekshon na katei ka thain” kala ong.
“Kaei kaba la thmu nyngkong kum ka nongrim treikam ha ri-lum Khasi bad Jaintia mynta la pynjem noh da ka buit treikam, da ka jingthaw ia ka Adhoc Committee ha ri-lum Garo kaba pyni shai kdar ia ka jingkwah har har ka VPP ban suhthied ha ka thain na ka bynta ki kam elekshon” ong ka kyrwoh.
Ka HNLC kala kynthoh ruh ia ka jingshong shah jingit jong u President ka VPP Ardent Miller Basaiawmoit ha u snem 2023.
“Ai ba ki paidbah ruh kin kynmaw ba u briew uba la shong shah jingit haduh 221 kynta, bad dawa ban pynthymmai ia ka Reservation Policy kat kum ka jingdon paid, mynta ula iada ia kane kajuh ka bhah kaba ula buh jingkylli ha ka por shah jingit” ong u Bah Sainkupar.
“Ha ka por shah jingit ha u 2023, ka jingkren u Bah Ardent hi ka long ba ka policy ka dei ban long kat kum ka jingdon paid. Kane ka jingkren ka long kaba shongnia, kaba buh ia ka bhah ba 40% ki Garo hapoh ka jingbishar. Um shym la kular ha katei ka sngi ba ka bhah ki Garo kan long kaba shngain. Um pat ju ong ba ki Jaidbynriew Garo kim dei ban khuslai halor kane”.
“Ka bhah 40% ki Garo kam long kaba shngain na ka jingdawa ba nyngkong jong u. Kam long satia kaba shngain na ki kyntien ba u kren” ong ka HNLC. “Hynrei kala shngain mynta, ym namar ka nongrim, ym namar ka jingdon paid, hynrei namar u snem 2028”.
U Bah Sainkupar ula pynkut da ka kyrwoh da kaba ong “Kumba la ong ia kaba dei, u briew um ym lah satia ban tih ia ka thliew ha ka por miet bad wan mih ha ka por mynsngi ban tyrwa aikti lang sha kito kiba hap hapoh kane ka thain bad khot ialade u Nongialam. Ki paidbah ka Bri Hynniewtrep kila iapeit, bad kin iai kynmaw”.
 ha ka sngi U Blei kala kynnoh ia ka Voice of the People Party (VPP) ba kala kynran dien na ka jingdawa bala slem jong ka halor ka State Reservation Policy na ka bynta ka “jingleh politics da kaba khein jingkhein” ban rung khlieh sha ri-lum Garo hashuwa ka elekshon 2028.){kind=link}