Shillong, Jymmang 31 : Ka Hynniewtrep National Liberation Council (HNLC) ha ka sngi U Blei kala kynnoh ia u President ka Voice of the People Party (VPP) Ardent Miller Basaiawmoit ba u “shukor ia ki paidbah” da kaba pynksan ia ka Article 371 haba “pynduh ia ki Bor Synshar nala tynrai ia ka bor sain hima”, bad dawa ba ki Syiem ki dei ban ioh ia ka “shuki ha ka jaka ba iashim rai”.
Haba kdew ia ka jingkren u Bah Ardent ha Sohra haba ka jingpule kot bad jinglum jingtip, u General Secretary ka HNLC Bah Sainkupar Nongtraw ula ong “Ka bha palat. Sa pule bha ia kane : Ha ka synshar paidbah kaba beit, ki paidbah ki dei kiba rai, kumta ki nongialam ki sheptieng ia u paidbah. Ha ka synshar paidbah ka bym beit, ki nongmihkhmat ki shim rai, kumta ki paidbah suki suki ki sdang ban sheptieng pynban ia ki nongialam”.
“Kane ka dei ka rukom kaba ka bor ka im ym tang da ka bor, hynrei da kaba pyniaid ba kumno ki briew ki pyrkhat, ki tieng bad kohnguh bad shim ia ka jingshisha ha ka sain pyrthei” ong ka kyrwoh. “Ka jingpyniaid kaba shyrkhei tam ka long haba ki briew ki shah khum ha ka rukom pyrkhat ban sngewthuh bakla ia ka jingpyndem ba ka dei ka synshar paidbah”.
Une u Nongialam ka HNLC ula kynthoh ba ka manifesto jong ka VPP ka iapher ia ka jingpan jingkyrshan na ka bynta ki bor synshar nala tynrai. “Ka manifesto jong phi ka pynksan ia ka Article 371. Ka Article 371 ka dei ka synshar paidbah ba rai da ki nongmihkhmat. Ki Dorbar Hima ki dei ka synshar paidbah ba rai da u paidbah. Kine artylli kiei kiei kim lah ban don ha kajuh ka senten satang lada phi la shukor khnang ia ki paidbah kiba sngap ia phi ha Sohra” ula ong.
Haba kdew ia ki kam bala leh pyrshah ia ki Khlieh Nongsynshar, ka HNLC kala ong “Ka Executive Committee jong phi kala sospon ia u Syiem namar ba um shim la siew ia ka synniang sha ka rukom treikam kaba ka rally jong phi hi ka pynrem. Phi pynduh ia ki bor synshar nala tynrai ia ka bor ha ka sain hima sima. Phi weng ia ka hok u Syiem ban iakhun, ban vote, ban shna mang tyngka bad ban thaw ain.
“Wat ju ieng hakhmat ki paid ka Bri Hynniewtrep haba sot ia ki Durbar Hima katba ka manifesto jong phi pat ka pyntroin ia ki” ong ka kyrwoh bad bynrap ‘Wat ju pyndonkam ia ka kyrteng jong ki bor synshar tynrai jong ngi kum ka rup ka rong sain pyrthei katba ka party jong phi pat ka leh ia kiei kiei kiba long pyrshah ia ka nongrim ba kine ki bor synshar ki ieng”.
Halor ka bynta jong ka District Council, ka HNLC kala kynnoh “Ka District Council mynta kala kyrduh pisa bha bad kala long tang kum ka synduk pisa ba pyrshang ban lute ba dawa na ki jingpynmih pisa ki Hima. Ka leh duna eh kum ka nongiada ia ki bor synshar nala tynrai bad bun kum ka bor treikam sain pyrthei kaba kyrduh pisa ba shaniah na ka jingkhlong ia ka pisa na ki Hima kiba dang don ia ki lad kamai”.
 ha ka sngi U Blei kala kynnoh ia u President ka Voice of the People Party (VPP) Ardent Miller Basaiawmoit ba u “shukor ia ki paidbah” da kaba pynksan ia ka Article 371 haba “pynduh ia ki Bor Synshar nala tynrai ia ka bor sain hima”, bad dawa ba ki Syiem ki dei ban ioh ia ka “shuki ha ka jaka ba iashim rai”.){kind=link}