Shillong, Nailar 14: U Lat ka Jylla Meghalaya u CH Vijayashankar ula pynher ia ka lama ka ri hynne ka sngi ha Lok Bhavan kum ka dak ban kynmaw ia ki sngi ba ngiew ha ka jingphiah ia ka Ri ne “Partition Horrors Remembrance Day 2026”.
Kane ka jingialang kala ai burom ia kito kiba la mad ia ki jingeh bad jingtynjuh na ka jingphiah ia ka ri India.
La pynlong ia ka jingsngap jar kaba 2 minit bad la pynbud pat da ka jingrwai ia ki jingrwai ieid ri ha ktien Garo, Jaintia bad Khasi da ki samla pule, ka jingpyninam ia ka koshor kaba bunjait jong ka Jylla.
Ha kane ka jingialang la iadonlang u HC Chaudhary, IFS, Additional Chief Secretary jong u Lat ka Jylla, ka heh ophisar Kong Camelia Doreen Lyngwa bad ki ophisar na ka tnad Arts & Culture bad ki khynnah skul.
U Dr David Arnold Kharchandy u Assistant Professor jongka Synod College ula ai jingkren ha kane ka jingialang.
Ula banjur ia ka jingdonkam ban kynmaw ia ka dor jong ka jinglen lade ki paitbah na ka bynta ka jingphiah bad ban rah shakhmat ia ka lynnoh jongka jingsuk, jingiatylli bad ia ka jingim suk jingim sain lang hapdeng baroh na ka bynta ki pateng kiban dang wan.
Kane ka prokram kadei da ka jingthmu ban pynskhem ia ka jingiar bad jingiatylli ha ka ri bad ia ka jingburom mar kylliang hapdeng ki jaidbynriew ki bapher bapher.
