Shillong, August 14: Shi sngi shwa ban rakhe ia ka Independence Day ne ka Sngi Laitluid, ka Sorkar Meghalaya kala pynkynmaw ia ki paitbah, ki tnad sorkar bad ia ki kynhun bapher ba kin bud ryntih ia ki kyndon jong ka Flag Code of India, 2002, kumba lah dep ban pynkylla ha u snem 2021 bad 2022 bad ia ka Prevention of Insults to National Honour Act, 1971.
Ha ka jingbthah kaba la pynmih ha ka sngi Thohdieng, ka Sorkar kala ong ba ka Lama ka Ri ne National Flag kadei kaba mihkhmat ia ka jingangnud jong ki paitbah bad dei ban leh ha ka rukom kaba don burom bha. Kala pynpaw ruh ia ka jingsngewkhia halor ka jingduna ia ka rukom ai jingpynsngewthuh ia ki paitbah ha kaba iadei bad ka ain, ka rukom leh bad ki kyndon ban pyndonkam ia ka, ka rukom pynher bad pynieng ia ka lama ka ri.
Strict compliance of the provisions of #FlagCode of #India, 2002 [as amended in 2021 & 2022] and the Prevention of Insults to #National Honour Act, 1971 @DiprMeghalaya @PIBHomeAffairs (https://t.co/WodPLBEgvW) pic.twitter.com/7fS143aJed
— Meghalaya Gov (@MeghalayaGov) August 14, 2026
Ka jingbthah kala kdew ban pynkynmaw ia ki paitbah ba ia ki lama kot kiba la pyndonkam ha ka por jong ka jingrakhe ha ka ri, ki kolshor bad ki lympung ialehkai ym dei satia ban leh bym suidniew ne ban shu bret pathar ha madan madiah bad dei ban bret ha kata ka rukom da kaba leh shimet marwei hi ha ka rukom kaba don burom ia ka lama ka ri.
Kine kidei ki katto katne ki mat ban kynmaw ha ka por ba pynher bad pyni ia ka lama ka ri:
1. Niewkor ia ka lama da ka jingburom: Ka lama ka ri dei ban pyni ha kata ka rukom kaba long don akor bad don burom.
2. Haba pynieng beit beit, ka bynta kaba don ka rong ‘Saffron’ kadei ban long ha khlieh eh, kaba lieh hapdeng bad kaba jyrngam ha trai eh bad u Ashoka Chakra udei ban long uba shai kdar bha.
3. Ka lama ka ri kam dei satia ban dei ha ka khyndew, madan ne ha ka sla um.
4. Ym dei ban pynieng da khongpong. Ia ka lama ym dei satia ban pynieng da kaba buh ia ka rong ‘Saffron’ sha trai eh.
5. Ym dei ban don kano kano ka jingthoh ne ki dak thoh ha ka lama ka ri.
6. Ym dei ban pyndonkam ia kino kino ki jingpynitynnad ne ki jingsuh pynitynnad. Ym dei ban pyndonkam ruh ia ka lama kum ka jainsiang miej, ban kah ia ka jingtei ne building, ia ka jaka ai jingkren ne ka rynsan ne ban pynkylla kum ka parda.
7. Ia ka lama ka ri ym dei ban pyndonkam kum shi bynta jong kano kano ka jain riam ne uniphom ne ban tah ne suh ha kino kino ki tiar ne ki jaka shong, ki kushon (Cushions), rumal ne napkin.
8. Ia ka lama ka ri ym dei satia ban pyndem shapoh pyrshah ia uno uno u briew ne ka tiar.
9. Haba pynieng ia ka lama ka ri kadei ban don ha ka jaka kaba don burom bad ym dei satia ban pynieng ia kano kano ka lama halor jongka lama ka ri.
10. Katkum ka jingpynkylla ne ka Amendment ha u 2022, haba ia ka lama la pynieng ha ka jaka kaba kylluid ne ha ka iing jong uno uno u dkhot jong ki paitbah dei ban pynieng ne pynher sngi bad miet.
11. Ki paitbah ki lah ban kaweh da ki lama kot ha ki jingialang kiba kongsan jong ka ri, ki kolshor bad ki jingiakob ialehkai. Hynrei kim dei pat ban leh bym suidniew ne ban bret ha madan hadien katei ka jingialang. Hynrei kidei ban bret da kaba leh shimet ha kata ka rukom da ka lynti jong ka jingburom ia ka lama.
Ka Sorkar Meghalaya kala ong, ba ki kot jong ka Flag Code of India 2002 bad ka Prevention of Insults to National Honour Act, 1971, kadei kaba ioh na ka website jongka Ministry of Home Affairs, https://x.com/MeghalayaGov/status/2088208837421809776
