Shillong, Nailar 14: Ki pulit ka East Khasi Hills kin pynkhreh ïa ki lad pahara kiba bniah bad kiba biang na ka bynta ka jingthmu ban pynkynriah iaki nongdie dukan madan na Laitumkhrah ha ka 17 tarik Nailar bad kiwei kiwei ki jingïakhih ba la thmu ban long hadien ka 17 tarik Nailar, ong u SP u Vivek Syiem.
“Ngi pyrshang ban pynthikna ba baroh kine ki jingiakhih, ki jingpynkynriah iaki nongdie jingdie madan, ki jingialang kin long kiba khlem jingjia bad kin iaid beit iaid ryntih” ong u Bah Vivek.
U Bah Vivek ula ong ba bunsien ki jingialang, ki jingiakhih kidei kiba la pan jingbit bad la buh ia ki kyndon. Ki bor Pulit kin bishar bniah ia ka jingpynkynriah iaki nongdie jingdie madan ne ki jaid jingiakhih bad yn wanrah ia ki Pulit reserve lada donkam.
“Ngin sa bishar bniah ia ki bor pahara kiba ngi don la ki long kiba biang ne em. Ngin sa leh ia kaba donkam katkum ka jingdonkam. Ngi lah ban wanrah daki reserves ha kano kano ka por,” u la ong.
U SP ula pyntip ba ki don ki drones kiba ki bor Pulit kin pyndonkam haki por pahara bad ban peitngor.
“Ngi pyndonkam da ki drone ha man la ka jingïalang bah. Yn pynher ïa ki drone bad ngin pyndonkam ïa ki na ka bynta ban peitngor.”
