Mairang, Risaw 24: Ka Pyndengumiong Government Lower Primary School Mairang, ka la pynkut noh ïa ka jingrakhe ïa ka Platinum Jubilee, lane ka jingdap 75 snem jong ka, naduh ba la sdang nyngkong ïa ka ha u snem 1950.
La pynkut ïa kane ka jingrakhe mynta ka sngi ka 24 tarik, ha ka jingdonlang u Myntri Sorkar ba dei khmih ïa ka Education Department bah Lakmen Rymbui kum u kongsan, ka Deputy Commissioner, kong Anita Kharpor IAS, bah D.Khyriem Superintendent of Police, bah J.Thyrniang SDSEO, bah B.Syiemlieh Chairman Managing Committee bad kiwei.
La pynshongshit ïa kane ka sngi da ki jingshad bad jingrwai na ki khynnah skul, la pynshoh biej ruh ïa ki nonghikai, ki kmie ki kpa, bad ki nongshah khot sngewbha da ka jingpyni riam ne fancy dress da ki khynnah rit. Ka skul ka la pynlong ruh ïa ka jingpynkup burom ïa ki saw ngut ki nonghikai kiba la shongthait na katei ka skul.
Ha ka jingkren u Minister, bah Lakmen Rymbui, u ai khublei ïa ka managing committee, ki nonghikai bad baroh kiba la don bynta ban pynïaid beit ïa ka skul, kat haduh ba ka la lah ban kynjoh ïa ka jingïaid lynti kaba 75 snem.
U pynpaw ïa ka mynsiem kaba kmen ban tip ïa ka history jong ka skul kaba long ka nuksa ïa kiwei pat ki skul ban bud. U la ong ba ki don bun ki skul sorkar kiba shah iehbeiñ bad duh jingshaniah na ki kmie ki kpa ban phah pule ïa ki khun jong ki, namar ka jingbym don ba shimkhia bad bym don ka jingkitkhlieh na ka liang ki nonghikai ïa ki khynnah.
Hynrei, u la ïaroh ïa ka Pyndengumiong Govt. LP School kaba la ïoh ïa ka jingshaniah na ki kmie ki kpa ban phah pule ïa ki khun jong ki ha katei ka skul bad kane ka la ïarap ha ka ban pynkiew ïa ka enrolment jong ki khynnah. Kane ka dei na ka jingshim ïa ka jingkitkhlieh da ka shnong, ka managing committee bad ki nonghikai.
U ïaroh ïa ka shnong bad ki nonghikai kiba la don ïa ka jingkitkhlieh, ban pynbiang ïa ka jingai jinghikai ïa ki khynnah skul da kaba thung extra nonghikai bad siew tulop ruh da ka shnong bad na ki nonghikai. Kane ka dei ka nuksa kaba bha ïa kiwei ba ki dei ban bud, namar ki skul ki donkam ïa ka jingïatreilang.
U la pynpaw ruh halor ka rai ba la shim da ka supreme court ba baroh ki nonghikai ki dei ban long kiba la pyndep ïaka MTET lait noh kito kiba don sa san snem ha ka service. U la kyntu ïa ki nonghikai ba kin long kiba la pynkhreh ïalade namar ki jingkylla kin wan katkum ka jingïaid ka por.
U la pyntip ruh ba ka sorkar ka la buh ïa ka thong ban pynïoh ïa ki skul building kiba kham heh bad bad kham bha, ban pynbïang ïa ki paiñkhana ha baroh ki skul bad ruh ki kitchen shed na ka bynta ka jingdonkam jong ki khynnah skul.
U la ong ruh ba ki don shibun ki skhim sorkar ba la mang na ka bynta ban kyntiew ïa ka ïoh ka kot ki nongshong shnong bad kumjuh ruh ïa ki samla. Kumta, u kyntu ïa ki ban shim ïa kane ka lad ban pyntreikam ïa ka na ka bynta ka jingmyntoi.
La pynkut ïa kane ka sngi da ka jingpynhiar ïa ka lama jong ka skul da u Myntri ka tnad pule puthi bah Lakmen Rymbui bad ka jingrwai ïa ka skul Anthem.
