Shillong, Lber 25: Ka National Conference jong ki Vice-Chancellors (VCs) iaka ba la jer kyrteng kum ka ‘Transformative Higher Education for Atmanirbhar Bharat’ kaba lai sngi la pynkut mynta ka sngi haka jingiashim bynta lang da u Lat ka jylla Assam u Gulab Chand Kataria, u nongaibuit ka tnat pule ka Assam u Dr Nani Gopal Mahanta, u myntri ka tnat pule puthi ka jylla Meghalaya u Rakkam A Sangma, u Vice-Chancellor ka USTM u Prof G D Sharma lem bad kiwei kiwei de.
Ia kane ka National Conference la pynlong daka Association of Indian Universities (AIU), New Delhi haka jingiatreilang bad ka skulbah University of Science and Technology Meghalaya (USTM) naduh ka 23 tarik haduh 25 tarik Lber 2023.
Haba kren ha kane ka sngi u Lat ka jylla Assam u Gulab Chand Kataria ula ai khublei iaka AIU bad iaki Vice-Chancellors kiba la wan shim bynta ha kane ka National Conference bad ula pynpaw ba ka thain bad ka ri India kan dei ka ‘Viswaguru’ lyngba ka pule puthi bad ka jinglah ban shakri iaki paidbha ka ri baroh kawei.
Naka liang u president ka AIU u Prof Suranjan Das ula ong ba kane ka National Conference bala pynlong daka USTM kan long ka jingsdang ban ia phylliew jingmut kumno ban kyntiew iaka pule puthi ha ki skulbah hapoh ka ri India.
Iaka jingsdang jong kane ka Conference la pyniaid da u Vice-Chancellor ka USTM u Prof G D Sharma bad iaka jingiatia la jer kyrteng kum ka ‘Future of Education, Learning, and Workplace’ bad ka phang pdeng ki long ‘Technology-based personalized teaching-learning models’, ka ‘Changing the role of teachers as facilitators’ bad ka ‘Preparing the students for future jobs’.
Iaka jingiatai baa khatduh la prat lynti da u president barim ka AIU u Prof. Ranbir Singh haka jingdon lang u Prof. Bhushan Patwardhan u badei ruh u Vice Chairman barim ka UGC & Former Chairman-EC, NAAC.
Ki nongkren ha kane ka sngi ki kynthup u Prof M M Pant, u badei ruh u Pro Vice-Chancellor, barim ka IGNOU (Online) u Prof Marmar Mukhopadhyay, u Director barim ka NIEPA, u Prof Parameswar K Iyer, Director, IIT, Guwahati.
Ha kane ka National Conference kaba lai sngi la wan shim bynta palat 500 ngut ki Vice-Chancellors bad Directors ki IITs, IISc, NITs.
