Shillong, Nohprah 12: Ka Seng Kynthei Jaiaw Langsning hynne ka sngi Ba-ar, kala pynkut iaka jingrakhe dap Jubilee Ksiar.
Lah ban kdew ba iaka Seng Kynthei Jaiaw Langsning la seng naduh u 1971 bad ha kane ka jingrakhe dap Jubilee Ksiar jong ka Seng la pynshongkun da u Myntri ka tnat Social Welfare Bah Paul Lyngdoh haka jingdon lang u MLA ka Mawkynrew u Bah Banteidor Lyngdoh, ki longkmie, ki rangbah bad ki khynnah ka Jaiaw-Langsning.
Haba kren ha kane ka sngi u Bah Paul ula ong ka Seng Kynthei Jaiaw-Langsning kala trei shibun ki kam naka bynta ka bha ka miat ki para nong shong shnong.
U Bah Paul ula ong ba ka shnong Jaiaw-Langsning kala kiew bha haduh katne namar ka jingialam lynti ki riew rangbah bad ki longkmie kiba long ki nongsain dur ban kyntiew iala ki nong shong shnong.
Ula iathuh ba ja Jaiaw-Langsning kadei ka shnong kaba rit kaba don tang 7 tylli ki Block hynrei kadei ka shnong kaba la iohi jngai.
“Ka jingkhlain ka jaidbynriew kadei ka ia tip lem para nong shong shnong bad lah ban ong ba ia kane la lamkhmat daka Jaiaw-Langsning” la ong u Bah Paul.
U Bah Paul uba bat ruh iaka tnat Social Welfare ula ong ba ka long kaba donkam ban kynthup lang iaki kynthei bad longkmie haka thma pyrshah ia u Droks.
U Bah Paul ula ong ba ki kam pynroi kim da kongsan eh khlem da tei iaki para briew bad dei namar kane donkam ban iatreilang ban iakhun pyrshah ia u Droks uba la rung sha tyllong ing ban pynjot iala ki para nong shong shnong.
Ha kane ka sngi u Bah Paul ula pynbna ruh ban synniang sa T.1 lak nalor ka T. 15 hajar kaba ula dep ban noh synniang dang shen
Haba kren ha kane ka sngi u Bah Banteidor ula ong ba kane kadei ka sngi ka ban sah jingkynmaw iaki kam baka Seng Kynthei kala leh naka bynta ka bha ka miat ki nong shong shnong ka Jaiaw-Langsning.
Ha kane ka sngi u Bah Banteidor ula synniang T. 1 lak shaka seng Kynthei Jaiaw-Langsning naka bynta ban pyntyllun iaki kam jong ka seng.
