Pynhap pyrda ka Ri Bhoi College ia ka taïew lehkmen

Nongpoh, Risaw 31: Ka Ri Bhoi College Students Union (RBCSU) ha ka sngi Palei, ka la pynhap pyrda noh ia ka taiew lehkmen lane ka College Event 2024 hapdeng ka jingiphuh iphieng.

Kane ka taiew lehkmen kala sdang naduh ka 25 tarik u Risaw bad la pynlong ia ka halor ka phang pdeng “The Dreams of Today are the Realities of Tommorow”.

La pynhap pyrda ia kane ka prokram da u MLA ka Nongpoh Bah Mayralborn Syiem kum u Kongsan ha ka jingiadinlang u Bah RR Makdoh uba dei uwei na ki dkhot ka Governing Body ka Ri-Bhoi College bad kiwei kiwei.

Haba ai jingkren, u Bah Mayral Born u la pynpaw ia ka jingsngewkmen kaba khraw ban ia donlang bad ki samla pule ha kane ka jingpynkut ia ka taïew lehkmen kaba long ka rynsan ia ki samla ban pyni ia la ki sap ki phong ba ki don nalor ka pule ka puthi.

U la kyntu ia ki samla pule ba ki dei ban don ka jingangnud ban long briew man briew ha ka jingim ka jong ki da kaba pynurlong ia ki jingphohsniew ba ki don na ka bynta ka lawei kaba phyrnai jong ki watla kin hap ban mad shibun ki diengpynkiang.

Shuh shuh ruh, u la ong ba bun na ki samla pule ki dei kiba wan na ka longiing baduk hynrei da ka jingtreishitom ka jong ki ban leh bha ha ki jingpule, ka long kum ka bainong ne ka jingsiew kylliang ia ki kmie ki kpa kiba angnud ban iohi ia la ki khun ba ki kiew ha ka jingim.

Nalor ka jinglehkmen ka RBCSU lem bad ka Ri Bhoi College ki la pynkup burom ruh ia ki katto katne ngut ki riew rangbah kiba don ia ka jingnoh synñiang na bynta ka Kolej ha kiba bun ki liang kata naduh ba la seng ia kane ka Kolej.