Shillong, Nohprah 17: Ka Meghalaya Speed Skating Association kala pynkut noh ia ka 2nd Meghalaya Open Speed Skating Championship ha ka Sngi Saitjaiñ kaba la pynlong ha madan jong ka St. Anthony’s Higher Secondary School, Shillong.
Ha kane ka jingiakob la wan ban iashimbynta da palat 50 ngut naduh kiba rit haduh kiba heh ka rta bad na ki skul jong ki district bapher hapoh ka jylla ha kaba ki nongiashimbynta kila sei ia la ka sap ka phong ha ka jingniah sted iaki Skate ki jong ki.
Kane ka lympung iakob kala long ruh kum ka rynsan ban kyntiew ia kane ka jingialehkai bad kumjuh ban plie lad ia ki khynnah ba kin don ia ka mynsiem ialeh hapoh ka jongki ban poi sha ka thong.
La sam iaki nongjop ha ki kyrdan bapher bapher da ki takma bad ki sertiphiket, ha kaba la iadonlang ki nongialam ka Meghalaya Speed Skating Association, ka Meghalaya Roll Ball Association, ki kmie ki kpa jong ki khynnah bad kiwei kiwei.
U Bah Suklang Dkhar uba long u President jong ka Meghalaya Speed Skating Association bad u General Secretary jong ka Meghalaya Roll Ball Association, ula pynpaw ia ka jingkmen ba kane ka lympung iakob ialehkai kala long kaba seisoh khamtam haba ki nongiashim bynta ruh kila lehkai bha met bad mynsiem bad ula banjur ia ka jingdonkam ban kyntiew shuh shuh iaka Speed Skating ha ka jylla Meghalaya.
Ka Meghalaya Speed Skating Association kala pynlong ia kane ka jingiakob da ka jingiatreilang bad ka Meghalaya Roll Ball Association.
