New Delhi, Jymmang 19 : Ka Reserve Bank of India (RBI) hynne ka sngi Thohdieng, kala pynbna ba kala shim rai ban pynduh noh ia ka jingpynmih bad jingtreikam jong ki lut T. 2000 haba aipor khatduh ruh ia ki nongshongshnong ba kin leit kylliang noh ia kine ki pisa hapoh ka 30 tarik u Nailur hapoh ki Bank.
Ka RBI ka pynpaw ba ka jingaipor ba 4 bnai kala biang eh ia ki briew ba kin leit kylliang ia ka lut T. 2000. La ngeit ruh ba bun na ka T. 2000 kiba la dep pynmih, la khmih lynti ba kin wan phai biang sha ki Bank hapoh kine ki saw bnai (30 tarik Nailur).
Hynrei ka RBI kala ong ba ka lut T.2000 kan dang iai bteng ban long treikam lada dei ba hap siew ia ka ram ka shah hadien ka 30 tarik u Nailur.
Kala pyntip ruh ba kane ka dei ka routine execise jong ka RBI bad ba ki nongshongshnong kim dei ban khuslai.
Ha kajuh ka por, ka RBI kala bthah ia ki bank ba kin sangeh noh mardor ia ka jingai lut T. 2000.
Ha u Naiwieng 2016, ka RBI kala wanrah ia ka lut T. 2000, da ka thong ban lah pyndap ia ka jingdonkam lut pisa hadien bala pynkut noh ia ka jingtreikam ka lut T. 500 bad T.100 kaba rim.
Ka RBI kala sdang ban shon ia ka lut T. 2000 hadien kane hynrei kala sangeh noh ban shon ia ka naduh u sne 2018-2019.
