Shillong, Jylliew 27: Kawei na ki projek jngohkai pyrthei kaba heh bha ha nongbah Shillong ka lah ban treikam naduh u snem ban wan, ha kaba ka Company ba pyntreikam ia ka Shillong Rope Way Project ba T.151 klur duna, kala pynthikna ia ka Sorkar Jylla ba kan pynsted ia ka jingtei hadien ki jingpynslem ha ka por ba sdang pyntrei ia ka project.
U Myntri Sorkar uba dei ruh u MLA ka South Shillong constituency bah Sanbor Shullai ha ka sngi saitjain u la leit ban jurip ia ka project ha Madan Laban haka jingdonlang ki nongialam ka Meghalaya BJP hapoh ka Pragati Path Yatra jong ka Sorkar Pdeng, ban rakhe ia ka jingdap 12 snem jong ka Sorkar NDA.
Ha kane ka jingleit jurip la don lang ruh ki nongmihkhmat ka KEC TLC ka Company ba pyntrei iaka project, ki Ophisar ka tnat Tourism bad kiwei kiwei ki tnad ba dei peit.
Haba ïakren shaki lad pathai khubor u Bah Sanbor u la ïathuh ba ka Shillong Ropeway Project kaba la mynjur ha u snem ba la dep ha ka jinglut kaba ym duna T.151 klur, ha kaba sdang nyngkong eh ki kam kila sahteng namar ka jingdonkam ïa ki jingbit ban pom dieng bad ka jingdon kiba mudui jong ka Public Interest Litigation (PIL) ha Meghalaya High Court.
Da kaba la shah weng noh ia ki PIL bad ka jingioh jingbit naki tnat bapher bapher, ka jingpyntei iaka Project ka la iaid shaid shaid.
Watla ka por ban pyndep ia kane ka projek ka kadei haduh lai snem, hynrei u Bah Sanbor u la ong ba ka Company ba pyntreikam ka la pynthikna ia u ba la pyrshang katba lah ban pyndep ha u snem ban wan.
U la iathuh ruh ba la siew T.3 klur sha ka Raid Laban Dorbar kum ka jingsiew bai lutksan na ka bynta ki jaka ba la shim na ka bynta katei ka projek.
Haba pynpaw ïa ka jingkyrmen halor ka Project, u Myntri u la ong ba ka Shillong Rope Way ka khmih lynti ba kan mih kum ka jaka jngohkai pyrthei kaba pawnam, kaba khring ïa ki nongwan jngohkai pyrthei na kylleng ka ri katba kan thaw ïa ki lad ïoh kam ïoh jam, kan kyntiew ïa ka ïoh ka kot ha ka thaiñ.
