spot_img

Pyndonkam u MDC ka BJP ia ki lad pathai khubor ban ak hok hynrei paw lut ki kam jyrsieh na ka jingkhynra ia ka Farm House

Date:

Share post:

TURA, Naitung 23: Man ka por ba ki Pulit ki shim ia ka sienjam ban leh eiei pyrshah ia ki kam bymman u MDC ka BJP Tura Bernard N Marak, une u MDC u kloi bha ban saitkhuid bad da ki snem ula kynthoh jur ia ki Pulit ba ki thombor bad pyndik ia u namar ba u dei u nongialam barim ka ANVC-B.

Ka buit jong u ka long ban kren sha ki lad pathai khubor ban pyni ialade kum u nongshah thombor ha ka kti jong ki bor ka ain.

Une u MDC ula pyrshang ia kajuh ka buit ha ka miet sngi thohdieng ha ka pot ba sdang ka jingkhynra ia ka farm house jong u. Ula ai wut wut ia ka kyrwoh sha ki lad pathai khubor haba khein ia kane ka jingkhynra ba ka dei ka kam beain namar ba ki Pulit kim don satia ia ma warrant ne ka jingbit bala ai da ka iingkashari.

Kiba bun ki kot khubor ba paw ha Jylla kila ngop ha ka khana jong une u Nongialam barim ka seng kaikhlaw tad haduh baroh ki jingshisha kila mih kiba pyni ia kaei kaba jia bad kiei ki kam kiba ju leh ha kane ka farmhouse.

Kane ka dei ka kam kaba une u Nongialam ka BJP ula leh la bun tylli ki snem mynta.

“U ju kam ki jait pa ki jait lane pyndonkam ia ka kyrteng thok jong ki Kynhun bapher bapher ban pynthamem hynrei ngi la lum ia ki sakhi satar pyrshah ia u kynthup ia ka jingphla jong ki Ehrang jong u, kiba la shah kem” ong ki Pulit ka Tura.

Ka Jingpynbthei Bomb ha Tura Petrol Pump bad jingkyllon iap ki 4 ngut ki ehrang ha ka jingkhynra ki Pulit:

Kawei ka jingpyrshang ban pynthame ka dei ka jingpynbthei bomb ha Tura Petrol Pump kaba don ha AOC Hawakahan ha kaba kawei ka kynhun kala pynmih mar mar ia ka kyrwoh ba thok ba kam ba ka dei ka kam jong ka kynhun kiengatiar ka bym don satia ia kaba la tip kum ka A’chik Matchapeng ka bym shym la pyn ngeit ia ki Pulit.

Ha ka janmiet jong ka 13 tarik Kyllalyngkot 2014, ka petrol pump jong ka AOC kala shah kawang da u bomb improvised explosive device (IED) bad ha kane ka jingjia, kala mih ka jingbthei kaba jam bha hynrei donbok ba ym shym la don mano mano ruh na ki nongiaid nongieng najan kane ka Pump namar ka jingkhang kloi ba dei ka ain tlang, kaba iada ia kano kano ka jingjia kaba sngewsih.

Kane ka jingpynbthei bomb ka dei ka jingpynhiar kput ia ka jingkhynra jong ki Pulit ia kane kajuh ka farmhouse ha Edenbari. Ha kane ka jingkhynra, ki Pulit kila kem ia bun ngut ki samla shynrang bad kynthei kiba dang shah hikai pyntbit ha ki kam siat khnam bad kine ki samla kila siat ruh ia ka kynhun ki Pulit kaba la pynmynsaw ia 2 ngut ki Pulit.

Hadien kane ka jingpynbthei bomb ha Petrol Pump, ki Pulit kila leit khynra biang sa ia kawei ka ktem jong ka ANVC-B kaba don ha ka thain Chunmati, kaba don ha khapsor ka Tura ha ka surok sha Kherapara. Ia kane la ktem la pynieng da une u MDC ka BJP uba la air uh ia ka jaka ka puta.

Ha kane ka jingkhynra, ki Pulit kila siat iap ia 4 ngut ki ehrang ANVC-B bad ioh kurup ia ki pistol, ki ryntieh bad ki khlam bad wat ki bomb IED kiba la buhrieh ha ki thliew ktieh.

Hadien kane ka jingpyniap, u Bernard ula phet na Ri-lum Garo bad jah rngai haduh bun bun bnai. Ula ioh iaid lait ia ka jingshah tian bishar namar ba u dei u dkhot ka Kynhun kiengatiar bad ruh uba don bynta ha ka jingiasoi ia ka soskular iasuk bad ka Sorkar.

Hynrei kine kim dei tang ki jingkynnoh kam bymman pyrshah ia une u Nongialam ka BJP uba la don ia palat 25 tylli ki case ha ki thanad Pulit ka Ri-lum Garo.

Ka jingthombor ia ka Iing u Nongialam Sengbhalang ha Tura kaba jia ha u snem 2019: U Bernard Rimpu bad u nongbud u Wilver Danggo, uba ialam ia ka Youth Wing jong ka BJP ha Ri-lum Garo, ki dei kiba thombor ia ka iing jong u Nongialam ka seng ADED bad AYWO ha Ri-lum Garo.

Ryngkat ka kynhun ba palat ar dorjon ki runar bala kiengatiar, u Bernard bad u Wilver kila rung jubir ha ka iing jong u Sengbath CH Marak uba dei u Nongialam ka AYWO bad u President ka ADE u Dalseng Bira Ch Momin kiba don ha Tura.

Da kaba pyni ia ki pistol bad ki wait kukhri, kine ki briew kila thombor ia ka iing ka sem bad rung wat sha ki kamra thiah jong kawei na ki kynthei ha ka Iing, kaba lam sha ka jingshah ujor ehahar halor ka jingkynnoh jrong kti bad jingpyrshang ban leh beijot pyrshah ia kine ki Kynthei.

Une u Nongialam ka ANVC-B ula kput ia kine ki Nongialam ka ADE, AYWO, GSY bad FKJGP hadien ba ki ai ka jingkyrshan ban wiang ding noh ia ka farmhouse u Bernard ha Edenbari halor ka jingkynnoh ba ki lum pisa beain na ki hajar tylli ki dukan thoh tim ha Ri-Lum Garo ha ka nam ban ai jingiada.

U Bernard ula kynnoh ia kine ki Sengbhalang ba ki lum pisa beain manla ka sngi na kine ki dukan thohtim bad dawa ba ki dei ban siew noh sha u (Bernard) ba un lah ban ai jingiada.

Ka jingpynrung ia ki Kynthei ha ka Women Armed Force da u Bernard (Jymmang 2013)- U Bernard Marak ula pyni ia ka jingbym khein snep halor ka jingmih ka khubor ba u pynrung kam kaikhlaw ia ki Kynthei ba lui lui na ki Shnong nongkyndong bad pynngop ia ki ba kin rung kam kum ki Women Unit jong ka ANVC-B.

Kat kum ka jingtip na ki pulit, u Bernard ula pynngop ia kine ki kynthei tang ban ioh pyniaid ia ki ha ki kam awria. Ki Pulit kila leit khynra ia ka farmhouse bad ioh pyllait ia bun ngut na kine ki kynthei.

Ka jingpyniap sangem ia u Nongtrei ka Petrol Pumo ha Tura:

Ha ka 14 tarik Nailar 2014, uwei u Nongtrei petrol pumo jong ka Rachel Petrol Station ha Bokmagre, kaba don shabar ka sor Tura, ula shah siat iap ha ki samla kiba wan da ki artylli ki thuk thuk ia kaba la suba jur ba ki dei ki ehran gka ANVC-B jong u Bernard Marak.

Ka jingkynshoit ban wanrah ia ka jingiapher jaidbynriew da ka jingpyniap ia u Nongbylla poiei:

Ha une ujuh u bnai, Nailar 2014, arngut ki Nongbylla na Assam kiba pyntrei ia kawei ka IIng shabar ka sor Tura, kila shah patam, shah the bad shah bom haduh ban da iap. Ia ka met jong kine ki Nongbylla la thep ha ki byrni bad la shu bret ia ki ha kawei ka riat kaba don ha surok sha Edenbari.

Ka jingtohkit jong ki Pulit ia kine ki jingja kala lam sha ka farmhouse jong u Bernard ha kaba kila ioh ban kem ia 24 ngut ki ehrang ban pynlong ia ka jingtohkit, kaba la jia ruh hadien ka jingioh ban kurup ia ki tiar siat bad ki wait khukri. 18 ngut na kine ki ehrang ki don ha ka Judicial Custody katba 6 ngut pat la aiti sha ki Pulit ba kin iai tohkit bniah.

Ka dei ha ka jingtohkit ba uwei na kine ki Nongialam ka ANVC-B u Salingbirth D Sangma ba ju khot sin u Solid, ula phla ia ka jingdonkti ha ki kam pyniap briew bala leh ban wanrah ia ka jingsngew iapher jaidbynriew hapdeng ki Garo na Ri-lum Haro bad ki paid Muslim na Dhubri Mankchar jong ka Assam, ban pynhun ia u Bernard Marak.

Ka Iingkashari kala pynmih ia ka warrant of arrest pyrshah ia u Bernard Marak hynrei une u MDC ka BJP ula jah rngai bad khlem wan mih pyrthei satia tad haduh ka jingiaid shakhmat ka jingiakren iasuk.

Ka jingthombor ia ki Nongialam ka Niam Catholic:

U Bernard Marak u dei ruh uba donkti ha ka jingthombor pyrshah ia u Bishop ka Tura u George Mamalassary bad ki Nongialam niam ba bud ia u, da ka jingthmu ban wanrah ia ka jingsngew iapher niam.

Kumba u ju leh, ula lum ia ki nongkyrshan bad pynlong ia ka jingiakhih da kaba shong kyllain mungor shabar ka Bishop House ha Tura haba dawa ba dei ban wanrah ia ki jingkylla ha ka rukom pyniaid ia ka niam.

Hadien kane, ka kynhun ki runar bala kieng ia ki tiar pynmynaw, kila rung jubor hapoh ka Catholic Parish School ha Dalu, kaba la jia ha ka por mynmiet ban wad ia u Parish Priest hynrei donbok ba une u Nongialam Niam ula lait da ka sait.

Ka jingtohkit ka pynpaw ba une u Nongialam seng kaikhlaw ula bitar ia kane ka skul Catholic hadien ba kam shym la thied shuh ia ki kor computer na u namar ba ki dei ki kor kibym bha bad kiba shu rem tang ka dor.

U Bernard u dei ruh uba shah kynnoh ban lamkhmat ia ka poster campaign ban dawa weng noh ia u Fr PD Johny kum u College Principal ka Tura Don Bosco.

Share post:

spot_img
spot_img

Popular

More like this
Related

Thoh ka Sorkar sha ka UGC ban ithuh noh ia ka Captain Williamson Sangma University

Baroh ki College Sorkar bad ki Aided kin hap...

Kular ka DGP ban leh eiei halor ki nongpynkulmar shnong bad ki jingeh ki PWD

Shillong, Jymmang 30: Ka Director General of Police (DGP)...

Kurup ka Tnad Custom ia ka bniat hati ba khia 27 kilo

Shillong, Jymmang 30 : Ha ka jingkhynra pyrshah ia...

Kyndit ka KSU ba phah pyniasoh ka Sorkar ia ki College sha ka Williamson Sangma University

Shillong Jymmang 30: Ka Khasi Students Union kala pynpaw...
spot_img