Shillong, Naitung 23: U Nongialam ka BJP bad MDC ka Tura u Bernard N Marak ula kyntait ia ka jingkynnoh ba u pyniaid ia ki kam awria n aka farmhouse jong u bala tip kum ka “Rimpu Bagan” ha Edenbari bad kynnoh ba ka jingkhynra jong ki Pulit ka dei kaba la leh khlem da ioh ia ka jingaibor(warrant) na ka Iingkashari.
Une u Nongialam ka BJP ula buh dak jingkylli ruh halor ka por ba wan khynra hynnin ka miet sngi thohdieng, kaba dei bad ka case POCSO kaba la register case naduh u bnai Rymphang 2022.
“Nga la ju ai ka jingiakren bad ka jingtohkit bad ngam ju phetrieh satia. Balei ba ia kane ka case la pyniasnoh bad ka jingkhynra hynnin ka miet?” ong u Bernard ha ka kyrwoh ba pynmih hynne ka sngi saitjain.
Une u MDC ka Tura ula ong “Kane ka jingkhynra ka dei kaba la buh jingmut lupa hapoh ka farm jong nga bad hadien ha ka IingKmie jong nga bad baroh ki jingkynnoh ki dei tang ka buit ban kem ia nga da kine ki jingkynnoh ba shu thaw suda. Ka jingkhynra ka dei kaba la pynlong khlem ka jingiohbor”.
Kane ka jingkynthoh u Bernard kala mih hadien ba ki Pulit ka West Garo Hills kila kam ba kila ioh kyndang ia ka kam khaii met n aka Rimpu Bagan kaba lam sha ka jingkem ia 73 ngut ki briew bad ioh pyllait ia lain gut ki Khynnah, kiba shah setkut hapoh kawei ka kamra jong kane ka Farmhouse ba long trai da une u MDC ka BJP.
U Bernard ula dei u Chairman barim ka ANVC-B kaba la pynduh pyndam, ula ong ba u dap da ka jinglyngngoh ban ioh ba u Deputy Commissioner bad u Superintendent of Police, kila iadonlang ha kane ka jingkhynra kaba la pynlong khlem ka jingiohbor na ka Iingkashari.
“Kane ka dei ka kam jong ka Tnad Excise ban pynlong ia kum kine ki jingkhynra hynrei ha kane ka jingja ia nga, la pynkhein lut ia baroh ki kyndon treikam. Ka dei ka nongkynti shimet jong nga bad ka dei kaba don shabar jong ka jaka Municipal” ula ong.
Haba kubur ba ka dei ka jingshisha ba kam shym la don licence satia naba u dei u riewlum, u Bernard ula kynjait mardor ia ka jingkynnoh ba u pyniaid ia ki kam awria bad kam ruh ba wat kito kiba shah setkut kim don bynta satia ha kino kino ki kam die met.
Une u MDC ula kam ruh ba ki Pulit kila rung jubor sha ka jaka jong u bad pyndik ia ki samla ba dang khynnah, kiba ula bei tyngka ban pule haba kynnoh ruh ba ki dei kiba donkti ha ki kam awria.
