Diaw ki nongïalam ka Raid Nongtung ba khlem larkam ki kular ki CM
Nongpoh, Nailar 04 :Ki Nongialam ka Synjuk ki Rangbah Shnong ka Raid Nongtung, Block-II, kila kynnoh ba ka Assam State Electricity Board (ASEB) kala trei pyndep mynta ban sieh nar bording elektrik ha ka shnong Sabuda bad Jatalong khlem ka jingkhein snep ia ka Sorkar Meghalaya ne ka kular bala khlei da ki arngut ki Myntri Rangbah ka Jylla Meghalaya bad Assam ha ka jingiakren ban pynbeit pud.
“Ngi sngewkhia jur ia ka jingmynthi jong ka Sorkar Meghalaya bad ki bor pyniaid District ka Ri-Bhoi kiba la sngap jar jar bad khlem tuklar khyndiat ruh ia ka jingwan sieh nar boring elektrik ka Assam ha Sabuda bad Jatalang tad haduh b aka ASEB kala pyndep ia ka kam” ong u Bah Blik Sohtun, Chairman ka Synjuk ki Rangbah Shnong ka Raid Nongtung.
Lah ban kdew hangne ba kane ka Synjuk lem bad ki paidbah jong kine ki Shnong kila pynpaw ia ka jingpyrshah kaba jur halor kane ka jingwan kyntur pud jong ka ASEB bad kila dep pyntip ruh sha ki bor District kiba la sngap jar jar haduh mynta.
U Bah Blik ula ong ba ka jingpyni jong ka sorkar Meghalaya bad ka bor District ia ka jingtlot bor kala pynlong ia ka ASEB ban shim kabu ban thom pyrshah ia ka jingsngew jong u paidbah ka thain.
“Ngi la dep ban ujor ia kane wat sha u Symbud Myntri Rangbah ka Jylla Bah Prestone Tynsong bad ruh sha u Deputy Commissioner ka Ri-Bhoi ba kin tuklar bad pynsangeh ia kane ka kam ka ASEB ban sam bording ha ki shnong jong ka Jylla Meghalaya” ula ong.
“Kaba sngewsih ka long ba watla ngi la dep ban ujor halor kane ka jingleh ka Assam, kam shem la don satia kano kano ka dak ka shin ba ki bor ka sorkar jylla Meghalaya kin tuklar ïa kane ka kam tad haduh ba ka Assam ka la ïohlad ban pyndep ïa ka jingsieh ïa kitei ki nar ilektrik “ ula bynrap.
Halor kane ka jingleh donbor ka Assam, ka Synjuk Ki Rangbah Shnong ka Raid Nongtung Block II kala rai ba shen kan sa lum paidbah ban ïeng pyrshah horkit hordang ban nym treh ïa ka jingsam bording ka Assam ha ki shnong khappud jong ka Meghalaya.
