Shillong Naitung 18: U Director ka School Education & Literacy ka jylla Bah Banteilang J Kharshandi ha ka sngi Thohdieng, ula pynmih ia ka jingpynbna paidbah kaba bthah ia baroh ki skul ki bym pat ioh jingithuh ba ki dei ban aplai noh mardor ban ioh ia ka jingithuh hapoh ka Right of Children to Free and Compulsory Education (RTE) Act, 2009.
U Bah Kharshandi ula ong ba ki skul kiba treikam khlem ka jingioh ia ka jingithuh kidei ban aiti ia ka aplikeshon ha ka Form 1 bad ban aiti sha ki District School Education Officers (DSEO) hapoh 6 bnai.
Ki skul ki dei ban ioh ia ka jingithuh na ki bor kiba dei khmih hapoh ka por kaba la buh ban bteng ia ka jingtreikam ka jongki.
Ki bym pyndep ia kane hapoh ka 6 bnai, kin mad ia ka jingshah khang khyrdep noh ia ka skul bad yn ym shah shuh ia ki ban bteng ka jingtreikam, la byrngem u Director.
Ka jingpynbna kala mana ruh ba yn ym shah shuh ia ki skul kiba thymmai ban plie khlem da ioh shwa ia ka jingithuh na ka sorkar.
La bthah ia ki bor pyniaid jong ki skul ki bym pat ioh ia ka jingithuh, kidei ban leit mih mardor sha ka ophis treikam jong ki District School Education Officers ban sdang ia ki kam ban ioh ia ka jingithuh.
 Act, 2009.){kind=link}