Shillong, Naiwieng 04 : Ka Meghalaya kala pyndep ia ki project surok bala bei tyngka da ka World Bank, kaba long haduh 330 km bad kumba 8 lak ngut ki briew la khein ba kin ioh jingmyntoi na ki lad pyniasoh kiba bha, ong ka kaiphod ba dang shu pynlait jong ka World Bank.
Ka Meghalaya Integrated Transport Project, ka dei kabala sdang pyntreikam ha u 2020 ban pynkhlain ia ki lad pyniasoh bad ka jingdon ia ki surok ba bha ha ki district, kala kut noh ha ka 31 tarik Risaw 2026, kumba la buh por.
Ka World Bank’s Implementation Status bad Result Report, bala pynmih ha ka 2 tarik Naiwieng, ka ong ba baroh ki kam ba la pyntrei ha ki project bapher bapher ha Meghalaya ki dei kiba la dep pyntrei lut, kynthup ki civil works, consultancy study bad ki jingpyntrei kyrkieh ban pynbha ia ki surok hadien ka jingjia shlei um ba jia ha u bnai Jylliew 2022.
Ka kaiphod ka ong ba ki kam bala pyntrei na kine ki project ki dei kiba ihun suda.
Ka kaiphod ka ong ba kumba 7,99,477 ngut ki briew, lane kumba 20% ki nongshongshnong ka Meghalaya, kila ioh jing myntoi na kine ki lad pyniasoh kiba janai lyngba ki 18 tylli ki project surok.
Ia kine ki project la pyntrei lyngba ka Meghalaya Infrastructure Development Finance Corporation (MIDFC), bad ka tnad Public Works Department kala shim ia ka bynta kaba khongsan ha ka jingtei ia ki surok bad ban sumar iaki.
Ka jingpyniasoh surok bad ka jingkhate ia ka por ha ka leit ka wan
Kai project kila pyni ia ka jingnang khlain ha ki lad pyniasoh shaduh ki jaka ba kyndong eh bad ki surok ha sor, da 338.54 km ki surok la dep ban pyntrei kat haduh u bnai Risaw 2026, kaba la palat ia ka thong bala buh, kaba long 200km.
Ka kaiphod jong ka World Bank ka shem ruh ba ki surok bala ithuh da ka Jylla kum ki State Highway bad ki surok kiba heh jong ki district ki dei kiba la dep pynbha kaba la kiew n aka 40% ha u bnai Jymmang 2020 sha ka 64.5% ha u bnai Risaw 2026.
Kine ki project kila pyni ruh ia ka jingkhate ba kot haduh 39.06% ia ka por ha ka leit ka wan bad ka jingpynlut na ka bynta ki kali ha ka leit ka wan kala hiar da 18.8%.
Ka jingbha jong ki surok la khmih lynti ruh ba kin pynduna ia ka jinglut ha ka leit ka wan bad pynlong ia ka leit ka wan kaba kham suk ia ki nongshongshnong, ki nongkhaii, ki nongrep, khamtam ha ki jaka kiba la shah ktah la slem na ka jingsniew jong ki surok ba kin lah ban poi sha ki jaka iew bad ioh ia ki jingshakri kiba donkam.
Ka jingpynleit jingmut sha ki surok ba lah ban kyrda ia ka mariang
Namar ki surok ki ju mad ia ka jinglynshop u slap uba jur, ka jingtwa khyndew bad jingshlei um, ki project ka World Bank kala phaikhmat ruh sha ka bynta ban pynkhlain ia ka jinglah jong ka Jylla ban shna ia ki surok kiba lah ban kyrda ia ki bor ka mariang.
Ka kaiphod ka iathuh ba ka Tnad PWD kala wanrah ia ka design na ka bynta ban shna ia ka surok ba 205 km da kaba pyndonkam ia ki buit treikam ki ban pynduna ia ka jingpynlut bad ba lah ban kyrda ia ki bor mariang. Kine ki surok la khmih lynti ban sa shna hapoh ki project ban sa wan ki ban bei tyngka da ka World Bank.
Ka Tnad kala design ruh ia 20 tylli ki jingkieng da kaba pyndonkam ia ki kyndon kiba lah ban kyrda ia ki bor ka mariang, bad kila don katto katne ki kam bala dep tyrwa, kiba la khmih lynti ban sa pyntrei ha ki project ban sa wan.
Ka jingpynkylla ia ki rukom treikam ha ka Transport
Nalor ka jingshna ia ki surok, ka project kala ai jingkyrshan ruh ia ka jingpynkylla ha ka rukom plan, ka jingpyniaid ia ki surok bad ka jinglah treikam ka tnad.
Ka Jylla kala pynkha ia ka Meghalaya Transport Board lyngba ka hukum ba 3 tarik Lber, 2026, kaba la thaw ïa ka rukom treikam ba pura ban ai jingbthah halor ki polisi bad ban peit bniah ïa ka jingpyntreikam ïa ki prokram kiba ïadei bad ka kam transport.
La pynkhreh ruh ïa ka State Transport Sector Modernisation Plan jong ka Jylla bad la ïoh ïa ka jingmynjur na ka Transport Board. Ka Sorkar Jylla kala pdiang bad pyntreikam ruh ia ka Integrated Transport Network Development Plan, kaba ai ia ka rukom treikam ban plan ia ka jingshna surok ha ka Jylla.
La pynbna ïa ka Road Research Laboratory jong ka tnat PWD kum ka Centre of Excellence, katba ka Jylla ka la pynkhreh ruh ïa ka Transport Sector Vision 2030 bad ka Financing Plan.
