Shillong, Jymmang 06: Ka Elite Task Security and Service Emergency kaba don ha Mawjrong, ka la sei ia 33 ngut ki samla shynrang bad kynthei kiba la dep ia ki jinghikai pyntbit ha ka kam ap pahara lane Security.
Ha kane ka sngi, la wan ban sakhi lang da u SI Home Guard, bah Shivam Nongrum kum u kongsan, Fr. Gedwin Warbah kum u symbud kongsan, bah Headingson Ryntathiang, bah Pynshai Mawrie, bah John Kharjahrin uba dei u Adviser, kong R. Suting kaba dei ka Director
Kine ki samla klai ioh ia ki jinghikai lyngba ka jingsnohkti ka Elite Task Security bad kiwei pat ki center kiba kynthup ia ka International Red Cross Society, Meghalaya Branch bad ka Civil Defence and Homeguard bad lyngba ka jingai jinghikai kaba 45 sngi, kine ki samla ki la ioh ia ki syrnod na baroh laitylli ki center, bad la ai ruh ki jinghikai ha ka English, Leadership Management, Personal Development, jinghikai ia ki skills development bad kiwei kiwei.
Haba phai sha kane ka passing out parade jong ka first batch, la ioh ban pynher ia ka lama lai rong jong ka Ri da u kongsan, bud sa ka march pass, bad la ioh ia ka jingpyntian smai na I kong R. Suting bud sa ki drill bad ki jingsam ia ki khusnam sha ki 33 ngut kiba la pyndep ia ka jinghikai bad kumjuh sha kiba ioh ia ki khusnam shimet.
U kongsan ha kane ka program, haba ai jingkren u la ai mynsiem ia ki samla ba ki la wan shakhmat, jngai na la ka ïng ka sem ban pynlut 45 sngi ha ka jingai jinghikai bad khlem kano kano ka jinglehraiñ, ki la wan da lade.
Shuh shuh, u kongsan u la ong ba ha kane ka por ba kyrduh kam kyrduh jam, ka ladei ka por ba ki samla kin wan ha kum kine ki jingai jinghikai, ban ieng ha la ki jong ki kjat namar kano kano ka kam ka wanrah ia ka jingsarong ia ka ïng ka sem.
U kongsan u la bthah ia ki khynnah kiba la pyndep ia ka training ba kin bteng biang ia ki jingshah hikai namar ha ki kyrdan kiba heh, kin dang shah hikai shuh shuh bad mynta ki kynti kan hap ha ka jinghikai jong u.
