Shillong, Naitung 04: Ka Sorkar Jylla hynne ka sngi nyngkong, kala mynjur ia ka kyndon ba pynkylla thymmai jong ka Meghalaya Profession, Trade, Callings and Employments Taxation Act, 1947, kaba hukum set along ia ki briew ki bym siew khuid ia ka khajna Professional tax.
Cabinet has approved the amendment to the Meghalaya Professions, Trades, Callings & Employment Tax Act. This will make registration mandatory for all. For Schedule Areas it will be done by District Councils & for Non Schedule Areas it will done by the Taxation Dept. pic.twitter.com/D4nD77zbpE
— Conrad Sangma (@SangmaConrad) July 4, 2022
Kane ka rai kala mih na ka jingialang jong ka Kynhun Myntri bala pyniaid da u Myntri Rangbah ka Jylla Conrad Kongkal Sangma, uba la iathuh ba kat kum kane ka jingpynkylla thymmai ia ka kyndon, baroh ki nongsiew khajna professional tax kin hap ban register kyrteng ialade bad ia kane yn pynshong nongrim kat kum ki jaka kiba hapoh ka Schedule Area bad Non-Schedule Area.
Ha ki jaka Sixth Schedule ne Schedule Area, ki nongsiew khajna kin hap ban register ialade ha ki District Council katba jong ki Non-Schedule area kin hap ban register hapoh ka tnad Taxation ka Jylla.
U Conrad u pyntip ba ka Sorkar kala rai ruh ba kino kino kiba kamai duna ia ka T. 1.8 lak kin ym donkam satia ban siew ia ka khajna.
“Shuwa kane, ki briew kiba kamai hapoh ka T. 50000 kim donkam satia ban siew khajna hynrei mynta ngi la pynkiew sha ka T. 1.8 lak” ula ong.
Shuh shuh, u Conrad ula pyntip ba kane ka jingpynkylla ka kwah ruh ban pynduna ia ka slab ne ka jingphiah ia ki kyrdan siew khajna na ka 12 sha ka 4. U la ong, kan don kaba T.1.8 Lak haduh T. 3 lak ha kaba ka khajna kan long T. 500, T. 3 lak haduh T 5 lak kan long T.1000 ka khajna, T. 5 lak haduh T.7.5 lak kan long T. 1500 ka khajna bad palat ia ka T. 7.5 lak kan long T. 2500 ka khajna.
U Conrad ula ong ba ka Sorkar kala rai ban pyndam noh ia ka kyndon kaba hukum ban set along haduh lai snem ia ki briew ki bym shym siew khuid ia ka khajna.
“Mynta ka kuna ia ki briew ki bym siew ia ka khajna kan long noh da ka jinghap siew haduh 4 shah ia kaba dei ban siew” ong u Conrad haba pyntip ba kan don ruh ka jinghap siew ia ka sut kaba long 12% shisnem ia kito kiba siew slem.
Kane ka jingpynkylla ia ki kyndon kane ka Ain kan treikam naduh ka 1 tarik u Iaiong mynta u snem.
