spot_img

Pynkhreh ka Sorkar da ka “Education Commission” ban pynbeit ia rukom treikam ki skul shimet ha Jylla

Date:

Share post:

Shillong, Naitung 04: U Myntri Rangbah ka Jylla Conrad Kongkal Sangma hynne ka ka sngi nyngkong, ula pyntip ba ka Sorkar kala pynkhreh ba shen kan sa wanrah noh da ka “Education Commission” ban pynbeit ryntih ia ka jingtreikam jong ki skul shimet hapoh ka Jylla.

“Katba ngi dang jam shakhmat, ngin sa wanrah noh da ki lad ki lynti ban pynbeit ryntih ia ki skul Shimet. Nga ai ksai da kaba iathuh ha phi ba ngin sa wanrah da ka kynja “Education Commission” ka ban peit ia ki kam ki jam ba iadei bad ki skul shimet” ong u Conrad haba iakren bad ki nongthoh khubor haba jubab halor ka jingkylli ia ka jingbymlah jong ki School Managing Committee (SMC) ban noh synniang lem sha ka bha ka miat jong ki Nonghikai.

“Hooid, ka long kaba donkam ban don noh ia ki kynja kyndon ban pynbeit bad pynjanai ia ka jingtreikam jong baroh ki skul Adhoc hynrei ngin sa leh ia kane ha ka por ka ba biang eh” ula bynrap.

Kane ka kam kala mih hadien ba ki Nonghikai Adhoc jong ki skul shimet kila pynlong ia ka jingiakhih da kaba thiah ha surok miet la bad sngi ban dawa ia ka Sorkar Jylla ba kan pynkiew ia ka tulop da T. 18000 bad ka increment ba 5% manla u snem.

U Conrad ula ong ba ki dei ki School Managing Committee (SMC) kiba pyniaid ia ki skul, kam dei satia ka Sorkar bad ki dei ruh kiba la pyniaid hi shimet hynrei ka Sorkar kala shu ai jingiarap ia ki.

U Myntri Rangbah ula kren ia kane haba ianujor bad ki Hospital shimet da kaba ong “Phi iohi hi ba kam dei satia ka kam ram ne jingbahkhlieh jong ka Sorkar ban peit ia kine kiei kiei hynrei hooid ngi sngewkhia halor ka pule ka dangle bad ngi sngew ba ki Nonghikai bad ki SMC bapher bapher kila leh iala ka jong ka bynta bad kila noh synniang sha ka pule ka dangle. Ta ka daw ka Sorkar ka kwah ban kyrshan bad kala ai ia ka jingkyrshan. Kumno ki SMC ki pyniaid, kane ka shong ha ka SMC bad ngam don eiei ban kynthoh”.

Haba kylli kaei ka jingpynshitom ba ka Sorkar kan shim pyrshah ia ki SMC halor ka jingbym lah ban tehlakam iala ki jong ki Nonghikai naba dei ka sorkar kaba ai ia ka Grant-in-Aid sha ki, u Myntri Rangbah ula ong “Phi kren ia kaba dei, ki SMC ki dei kiba ioh pdiang ia ka pisa bad kane ka dei ka jingpynbeit kaba iaid mynta. Ki dei kiba pyniaid shimet bad ka jingthungkam ruh ka dei kaba leh da ki SMC bad ki hap shim ia ka jingbahkhlieh ban pyniaid ia ki skul”.

U Conrad ula ong ba ki SMC kin hap ban khmih ia kine ki bynta ruh haba ong ba ki don katto katne ki SMC kiba la treikam bha bad don ruh ki bym shym la lah ban treikam bha.

“Ta ka daw, ngi dang thmu ban wanrah noh ia ka shnat treikam, kum ka Commission ka ban khmih ia kine kiei kiei bad ki kam kiba iadei bad ka pule ka dangle hapoh ka Jylla. Ka Sorkar kala pyndep iala ka kamram ban ai pisa, kyrshan ia ki Nonghikai shimet hynrei ki dei ki SMC kiba thungkam ia ki, namar kata ki dei ki SMC ban shim ia ka jingbahkhlieh” ula ong.

Haba pynpaw ba ki don shibun kiei kiei kiba hap ban pynjanai, u Myntri Rangbah ula ong “Ngi kyrmen ba ngin sa iohi ba katba ka jingpynkiew ia ka grant-in-aid sha kine ki sul ka la iaid shakhmat, ngin peit ruh ba kan don ka jingpynjanai ha ka rukom treikam jong kine ki skul”.

Share post:

spot_img
spot_img

Popular

More like this
Related

Kular ka DGP ban leh eiei halor ki nongpynkulmar shnong bad ki jingeh ki PWD

Shillong, Jymmang 30: Ka Director General of Police (DGP)...

Kurup ka Tnad Custom ia ka bniat hati ba khia 27 kilo

Shillong, Jymmang 30 : Ha ka jingkhynra pyrshah ia...

Kyndit ka KSU ba phah pyniasoh ka Sorkar ia ki College sha ka Williamson Sangma University

Shillong Jymmang 30: Ka Khasi Students Union kala pynpaw...

Plie ka DGP ia ka jingkhang ban sngap ia ki jingeh bad jingai jingmut ki paidbah

Shillong, Jymmang 30: Kum shi bynta ban tei iaka...
spot_img