Hap buria ka Sorkar haduh T.100 klur ban pynkiew tulop ia ki Nonghikai Adhoc

Date:

Share post:

Pynkiew T.9000 ia ki skul Secondary, T. 6000 ia ki Primary

Shillong, Naitung 04: Ka Sorkar Jylla kala rai hynne ka sngi nyngkong, ban pynkiew noh ia ka tulop jong ki Nonghikai skul Adhoc naduh ki Higher Secondary haduh ki Lower Primary, kaba kiew da T.9000 bad T.6000 manla u bnai.

Ka Sorkar kala shim ia kane ka rai ha ka jingialang jong ka Kynhun Myntri kaba la ai jingkhein ba ka Sorkar kan hap ban buria sa T. 100 klur shisnem ban siew ia kane ka tulop thymmai ka ban sdang treikam naduh ka 1 tarik u Naitung.

U Myntri Rangbah ka Jylla Conrad Kongkal Sangma haba iakren bad ki lad pathai khubor hadien ka jingialang, ula iathuh ba ka jingpynkiew tulop ia ki Nonghikai Higher Secondary, Secondary bad Nonghikai Science kan long da T.9000 shibnai katba ia ki nonghikai Upper Primary, Lower Primary, Nonghikai Hindi bad ki 4th Teacher ka SSA kan kiew da T. 6000 shibnai.

U Myntri Rangbah u ong ba kane kan mut ba ki Nonghikai Secondary School kiba ju ioh tulop T. 24,000/- kin ioh noh T. 33,000/-, ki Nonghikai Secondary school kiba ju ioh T. 20,000/- kin ioh noh T. 29,000/-, ki Nonghikai Science kiba ju ioh T. 22,000/- kin ioh noh T. 31,000/-.

Kumjuh ruh ki Nonghikai Upper Primary kiba ioh ioh T. 16,000/- kin ioh noh T. 22,000, ki Lower Primary, Nonghikai Hindi bad Nonghikai 4th Teacher ka SSA kiba ju ioh T. 12,000/- kin ioh noh T. 18,000/-.

Haba pyntip ba kane ka rai ka dei kaba la shim hadien saw snem naduh ba pynkiew ia ka tulop ba khatduh ha u bnai Jylliew 2017, u Myntri Rangbah ula ong “Halor ki dorkhas bapher bapher bala ioh pdiang, ka Tnad Education kala wanrah ia ka jingtyrwa bad ka kynhun Myntri kala iamir jingmut bniah bha bad shim rai ban pynkiew biang noh ia ka Grant in Aid sha ki skul Adhoc”.

U Myntri Rangbah ka Jylla ula pyntip ba ka jngktah jong kane ka jingpynkiew tulop ia ka pla tyngka ka Sorkar kan kot sha ka T. 100 klur shisnem. “Namar kane, ka Sorkar kan hap ban pynlut haduh T. 310 klur shisnem n aka T. 212 klur” ula ong.

Haba kylli halor ka jingdawa ban ai ia ka increment (jingpynkiew) ba 5% manla u snem, u Myntri Rangbah ula ong ba ka Sorkar kala kyntait ban iakren ia kane ka jingdawa. Ka daw ba u la ai ka long ba kine ki Nonghikai ki dei jong ki skul adhoc bala pyniaid da ki riew shimet ym ba ki dei ki skul sorkar.

“Ngi khlem wai ban ai ia ka 5% ka Increment..namar ka jingbahkhlieh hi ka shong ha ki School Managing Committee (SMC). Ki lah ban shim bai skul hynrei kane ka bai skul kam ju wan sha ka Sorkar Jylla hynrei ka neh beit ha ka pla tyngka ki SMC” ula ong haba bynrap “Ka Sorkar ka dei kaba shu iarap ia ki skul shimet namar ka sngew ba ka pule ka puthi ka dei kaba donkam bad ka pisa ba ka ai ruh ka dei kaba iaid beit beit sha ki Managing Committee jong ki skul ba kin pyniaid.

U Myntri u Rangbah u la ong, dei namar kane ka daw ba ka Sorkar kam shym la shim rai halor ka 5% increment bad ka long kaba eh ruh ia ka Sorkar ban leh ia kane haba buh hakhmat ia ka jingeh bad mad ka Jylla na ka jingkyrduh pisa.

U Myntri Rangbah ula pyntip ruh ba ka rai jong ka Sorkar ban pynkiew ia ka grant-in-aid ba kot T. 100 klur kan sa ktah jur ia ka jingmang pisa namar yn hap ban khate na ka mang tyngka jong kiwei pat ki Tnad ban pyndap ia kane.

“Kiba bun ki kam pynroi kin sa shah ktah. Ngin nym lah shuh ban pyntrei ia ki project kiba ngi la buh jingthmu. Ngi don shibun ki project kiba la thmu ban pyntrei naka Tnad C&RD lane ka Tnad Pulit bad ruh ha ka Tnad Pule Puthi kumjuh. Nga la dep mang ia palat T. 100 klur ban tei ia ki Iingskul ba thymmai bad nga la buh ruh sa T.100 klur tam ban pynbha ia ki skul Lower primary ka Sorkar da kaba ai sha ki haduh T. 2 lak – T3 lak” ula ong.

Share post:

spot_img

Popular

More like this
Related

Hukum ka Iingkashari ia ka Sorkar ban bud ia ki kyndon ban wanrah jingkhuid ha pung Umiam

Shillong, Rymphang 24 : Ka Iingkashari Meghalaya High Court...

Govt to issue notification on age limits for jobs soon

SHILLONG, FEB 26: Chief Minister Conrad K Sangma on...

Shen yn pynmih jingpynbna ka Sorkar halor u pud rta ioh kam

Shillong, Rymphang 26 : U Myntri Rangbah ka Jylla...

Yn pynlong jingiakhih ki ar seng namar ka jingslem ban pynmih ia ka resol DSC

Nongpoh, Rymphang 26: Ka Ri Bhoi People’s Council (RBPC)...