Shillong, Naitung 4 : Ka jylla Meghalaya ka la shah jied ban pdiang ia ka khusnam ‘Best Performer’ na u Myntri ka tnad Commerce and Industry jong ka sorkar pdeng, u Piyush Goyal na ka bynta ka jingnang kiew ha ka jingdon jong ki nongseng kam lajong.
Ia katei ka khusnam la leit ban pdiang da ki heh sorkar ha ka jingialang kaba long ha nongbah New Delhi.
Ryngkat ka Meghalaya, ki ar tylli kiwei pat ki jylla kiba ioh pdiang ia katei ka khusnam ‘Best Performers’ ki kynthup ia ka Gujarat bad ka Karnataka, katkum ka jingphiah kyrdan ia ki jylla ha ka thup ka jingnang kiew ka jingdon ki briew kiba sengkam lajong.
Baroh ki don haduh 24 tylli ki jylla bad 7 tylli ki UT kiba shim bynta ha katei ka thup iakhun halor ki 7 tylli ki phang bad 26 tylli ki kam. Ia ki jylla baroh la phiah ha ki san bynta, kata ka – Best Performers, Top Performers, Leaders, Aspiring Leaders bad Emerging Startup Ecosystem.
Haba kren bad ki lad pathai khubor ha ka sngi Nyngkong, u Myntri Rangbah ka jylla, Conrad K Sangma u la ong ba ki dap da ka jingkmen kaba khraw ban ioh ia katei ka jingithuh khamtam haba ka sorkar Meghalaya ka la pynleit jingmut bha na ka bynta ban seng kam lajong la slem bha.
“Nga ialade nga dei u nongtreikam la jong, nga la kynduh bun ki jingeh dang sdang khamtam ka jingduna ki nongkyrshan. Hynrei da ka jingkyrshan ba malu mala kat kaba lah, kan sa ai mynsiem ia ki nongtreikam lajong ban iaid shakhmat. Bad ha ka lynti iaid hi na ka bynta kano kano ka kam, lada phim pynshlur ia ki nongtreikam lajong ba kin iaid shakhmat ka ioh ka kot bad ka kamai kajih hi kan ym kiew,” u la ong.
Na ka liang u Myntri Rangbah u la ong ruh ba ka kamram jong ka sorkar hi ka long ban long ki nong mait lynti bad ki nongthaw lad na ka bynta ki nongtrei kam lajong ba kin lah ban iaid shakhmat.
“Nga ai burom ia kane ka khusnam ba ka jylla ka ioh sha baroh kito ki nongtreikam lajong na kane ka jylla,” u la ong.
I congratulate our entrepreneurs and the entire PRIME team. We will continue to support our youth and start ups in every possible way.@PMOIndia @PiyushGoyal @nsitharaman @CimGOI @NITIAayog
— Conrad Sangma (@SangmaConrad) July 4, 2022
