Shillong, Naitung 20 : Ka Meghalaya High Court kala pyndam noh ia ka mukotduma POCSO hadien ka jingshem ba u nongshah kynnoh bad ka lanot kila iashong kurim bad iasahlang lem bad I khun ba 3 snem ka rta.
Ka Chief Justice Revati Mohite Dere haba ailad ia ka CrI.Petn. No. 62 of 2026, kala kdat sharud ia ka ejahar bala register ha ka 28.06.2023 ha Williamnagar Women Police Station hapoh ka kyndon 5/6 jong ka POCSO Act.
Kane ka mukotduma kala sahteng kum ka Special (POCSO) Case NO. 14/2023.
Kat kum ka mukotduma, u nongmudui Sitting G Momin ula don 25 snem bad ka lanot ka don hapoh 18 snem ha ka por ba ujor ia ka ejahar.
Baroh arngut ki nongmudui hadien kila kyrpad ban pyndam noh ia ka ejahar halor ka nongrim ba ki don jingiadei, iathoh ha ka 30.06.2026 bad hadien kila don ia u khun shynrang.
Hadien ka jingbthah ka Iingkashari, ka High Court Legal Services Committee kala aiti ia ka kaiphod ba pynpaw ba kine ki shijor, kiba la don mynta 28 bad 19 snem, ki iasah ha ka shnong Saminindikim, East Garo Hills.
Ka kaiphod ka iathuh ba kane ka briew kala iasahlang bad une u nongmudui “namar ka jingieid bad jingsngewjan ia u” bad kam don kano kano ka jingpyrshah ban pyndam noh ia ka mudui.
Ki Pulit kila pynthikna ruh ba ki bahaiing hasem kila kyrshan ia kane ka jingiadei hapdeng kine ki arngut ki shijur.
Ka Iingkashari kala bthah ia ka DCPO, East Garo Hills bad Secretary DLSA ban pynthikna ba kane ka briew bad I Khun ki dei ban ioh ia ka jingmyntoi na ki skhim kiba kynthup ia ka Nirbhaya Fund, Mission Vatsalya, Ayushman Bharat bad Meghalaya Victim Compensation Scheme.
Ka ong ruh ba kano ka jingsiew bailutksan ba ai sha ki, dei ban buh ha ka fixed deposit tad haduh ba kane ka kynthei kala kynjoh ia ka 25 snem, ryngkat ka jingsiew ia ka sut ba shisien laibnai sha ka.
