Shillong, Naitung 20: U Adviser jong ka kynhun Cook-cum-Helper PM Poshan, Meghalaya, Bah Khroo L Pariat u la kyrpad ia u Myntri Rangbah duh bad ka Sorkar Pdeng ban pynkiew noh iaka bai nong kaba la neh ha ka juh ka dor mynta la palat 20 snem, haba maham ba lada ka Sorkar kam pynkiew, ki Cook-cum-Helper kin nym pyntreikam shuh ia ka skhim PM Poshan.
Haba kren sha ki lad pathai khubor u Bah Pariat u la ong ba ia ka bai nong kaba T. 900 shi bnai na ka bynta 10 bnai ha ka shisnem ym pat shym la pynkiew mynta la palat 20 snem.
“Na ka liang jong ki Cook-cum-Helper PM Poshan jong ka Meghalaya bad ka thain shatei lammihngi, ngi la wan shakhmat mynta ka sngi ban kyrpad ia u Myntri Rangbahduh ka ri India ban pynkiew noh ia ka bai nong” la ong u Bah Pariat.
U Bah Pariat u la ong ba ka kynhun ka la iakynduh ia ka Myntri ka tnat pla pisa ka Sorkar Pdeng ha ka jingwan jong ka ha Shillong.
“Ka la pyntip ia ngi ba katei ka kam ka dang don hapdeng ka iingbishar bniah daka Ministry of Education bad Ministry of Finance ka Sorkar Pdeng hynrei ba ki don ki jingeh ha ka liang ka ain. Haba ngi la wad bniah, ka la kdew ba don kiba la leit sha ka iingbishar” u la ong.
U la bynrap ruh ba ki nongïalam ba kynthup ïa u Symbud Myntri Rangbah u Bah Sniawbhalang Dhar bad u Myntri ka tnat Pule Puthi u Bah Lahkmen Rymbui ki la don lang ha kane ka jingïakynduh, bad ka Myntri ka tnat pla tyngka ka Sorkar Pdeng ha kaba kala kyntu ia ngi ban long kiba iaishah.
U Bah Pariat u la ban jur ia ka jingnoh synniang jong ki Cook-cum-Helpers, ha kaba kiba bun napdeng jong ki, kidei ki kynthei na ka thain shatei lammihngi.
“Ki Cook-cum-Helpers ki la don ka bynta kaba khraw ha kaba pynwandur ia ka pule puthi ha ka thain, khamtam ha ki Primary School” u la ong.
Da kaba kdew ïa ka histori jong ka thaiñ, u Bah Pariat ula bynrap, “Shwa u snem 2000, ka thaiñ shatei lammihngi ka la sakhi ïa ki kam lehnoh bad ki jingeh namar ka jingbym thikna ka shong suk shong shngain. Hynrei hadien bala pyntreikam iaka skhim PM Poshan khamtam ha Meghalaya bad ha kylleng ka thaiñ shatei lammihngi, ngi la ïohi ba ki Primary ki ïarap bha ïa ki khynnah skul.”
“Kumta ka jingnoh synniang jong ki Cook-cum-Helpers lyngba u PM Poshan ka la ïarap ban teh lakam ïa ki kam lehnoh bad ka la noh synniang sha ka roi ka par jong ka imlang sahlang baroh kawei,” ula ong.
Ka kynhun ka la dawa ba dei ban pynkiew ia ka bhah jong ka Sorkar Pdeng na ka T.900 sha ka T.9,000 shibnai, da kaba pyrkhat kyrpang ia ka thain shatei Lam Mihngi ha kaba ka rukom ai pisa ka long 90:10 hapdeng ka Sorkar Pdeng bad ki Dorkar Jylla.
U la kdew ba ka Meghalaya ka la dep ban kyntiew iaka bai nong badei ban siew na ka bhah jong ka Sorkar Jylla.
“Ka Sorkar Meghalaya hapoh ka jingialam u Myntri Rangbah u Conrad K. Sangma ka la pynkiew ïa ka bai nong ha u snem 2022 na ka T.100 tyngka sha ka T.1100 haka shibnai na ka bhah jong ka Sorkar Jylla. Ka jylla Meghalaya mynta ka don ha ka kyrdan kaba nyngkong ha ka thaiñ shatei lammihngi bad kaba 5 ha ka ri baroh kawei. Ka Kerala ka siew T.12 hajar, ka Delhi pat ka siew T.8000.
U la ong ba ka Kynhun kaa aiti dorkhas sha u Myntri Rangbahduh bad sha ka tnad pule puthi bad ka tnat pla pisa ka Sorkar Pdeng halor kane ka mat jingdawa.
“Lada ka Sorkar Pdeng kam pynkiew ia bai nong kaba la don bynta la palat 20 snem, ngi kum ka kynhun kaba don palat 20,000 ngut ki dkhot katkum ki rekod jong ka Sorkar Meghalaya, ngi la rai ban sangeh noh ban pyntreikam ia ka skhim PM Poshan ha kane ka thain” la maham u Bah Pariat.
“Ngim lah ban im da kane ka bai nong kaba ngi ioh T.900 na ka bhah Sorkar Pdeng.”
U la kyrpad ia baroh ki MP jong ka Lok Sabha bad Rajya Sabha na ka thain shatei lammihngi bad ha kylleng ka ri India ba kin shim khia ia kane ka kam ha kane ka dorbar synrai kaba dang shu sdang mynta ka sng.
