Nongpoh, Jymmang 21: U Deputy Commissioner ka Ri-Bhoi District, ula pynbna ia ki 4 tylli ki shnong ka District kum ki Containment Zone namar ka jingsyllad jong ka khlam sniang bala tip kum ka African Swine Flu.
Kine ki shnong ki kynthup ia ka Umsawriang, Madan Nonglakhiat, Mawlyngkhung bad ka Syllei-U-Lar.
U Deputy Commissioner ula pynjari da ka kynhun ain 144CrPC ha kine ki shnong hadien b aka Ophis u District Animal Husbandry & Veterinary, kala pynthikna ia ka jinglynshop ka khlam sniang ha kine ki shnong.
U DC u la pynbna bad mana ia kito kiba ri sniang, kiba ot doh sniang bad kiba die ia ki doh sniang ha kine ki thain, ba ki sangeh shwa shipor ia ka iakit iarong ia ki sniang na kine ki shnong sha kiwei pat ne ban pyniap ha kaban bam doh katba ym pat lah ban tem ia kane ka jingpang khlam jong ki sniang ha kine ki shnong bad ki shnong kiba Marjan.
U la bthah ruh ia kito kiba ri dohsniang bad ot dohsniang ba ki dei ban pyndonkam ia ka jingleh khuid kaba tikna ban khanglad ia ka jingsaphriang jong kane ka jingpang khlam hapdeng ki sniang.
