Shillong, June 3: U Myntri Rangbah ka jylla u Conrad K. Sangma ula pynbna ia ka jingtyrwa ban don ia ka Film Institute ha ka jylla bad ka ong, ba yn sa pynlong ia ka Film Festival ha kylleng ki district ym tang hapoh ka nongbah Shillong.
Haba kren ha ka Hello Meghalaya – Integrated Grant Disbursement Event kaba la long ha Shillong, ula ong ba ka Film Institute kan iarap ha kaban ai jinghikai ia ki nongshna phlim kiba dang samla bad ia ki tyngshop ki puron kiba na Meghalaya bad ban khring ruh ia ki riewdonsap kiba hapoh ka ri bad kiba nabar ri. “Lah ban khot iaka da ka Conrad Film Institute ne da kawei pat” ula ong ryngkat bad ka rkhie, “Hynrei ka jingthmu ka long kaba shisha, ngi kwah ban ai ia ki samla ia ka kabu kaba shisha ban kiew ha kane ka bynta”.
“Ngi ngim kwah ba kaei kaei kan jia tang ha ka nongbah” ula ong. “Ngi kwah ba ki briew ha Tura, Jowai bad ha kiwei kiwei ki jaka kin donbynta lang ha kane ka cultural movement.”
Kum shi bynta jong kane ka prokram, la sam ia ka Grant sha ki nongshna phlim ka jylla hapoh jong ka Hello Meghalaya program. Ka sorkar kala pynbna ruh ban don ia ka ‘Filmmaking Exchange’ bad ki Film bad Television Institute ha Arunachal Pradesh ban kyntiew ia ka jingioh jinghikai bad ia ka jingiatreilang kum ka kynhun hapdeng ki nongshna phlim kiba dang samla ka thain.
U Myntri Rangbah ula ong ba kine ki sienjam kidei shibynta jong ka jingpynwandur ia ka Draft Meghalaya Film Tourism & Creative Media Policy 2025, ia kaba la plie na ka bynta ki paidbah ba kin ioh ban ai jingmut hashwa ban pynskhem noh ia ka.
“Ngi dang pyrshang ban thaw ia kaei kaei kaba lah ban neh slem. Kam dei tang na ka bynta kawei ka jingialang, hynrei kadei na ka bynta ban pynthikna ba man la ki khynnah kiba dang samla ryngkat bad ki khana kiban iathuh kin ioh ia ka lad ban sam sha kiwei pat” ula ong.
Ia kane ka prokram la pynlong da ka Department of Tourism, jong ka sorkar Meghalaya bad ha kane ka prokram la pyllait ruh ia ka Meghalaya Film Tourism & Creative Media Policy 2025, ka jingsam ia ki Grant sha ki nongshna phlim, ka jingpynbna paidbah ban don ia ka Filmmaking Exchange bad ka jylla Arunachal Pradesh bad ka jingaiti ia ka Ward’s Lake da ka Tnad Forest sha ka Tnad Tourism.
Ha kane ka jingialang kala don ruh ka jingpyllait paidbah ia ka Tourism Buddy Programme bad ka jingkaweh lama jong ka jingsdang ia ka Hello Meghalaya Road Show kaban iaid ha kylleng ki jaka kum ka jingrakhe ia ka jingiathuh khana tynrai ka jylla bad ka jingpyni ia ka sap ka phong.
