Shillong, Naiwieng 16 : U Myntri Rangbah ka Jylla Conrad K Sangma ha ka sngi Saitjain ula pynbna ia ki katto katne ki rai bala shim da ka Sorkar ban khmih lem ia ka bha ka miat jong ki nongpathai khubor ha Jylla Meghalaya.
Haba kren ha ka jingrakhe ia ka National Press Day ha Shillong, u Conrad ula pyntip ba hapoh ka skhim ki nong pathai khubor, ka Sorkar jong u kala kyntiew ia ka pisa na ka T. 1 lak sha ka T.5 lak kum ka song jingiarap sha ki bahaiing jong ki nongpathai khubor kiba khlad.
Ula pyntip ruh ba ka Sorkar kala nang kyntiew ia ka song jingiarap pisa ba ju ai sha ki nongpathai khubor, kiba duh noh ia ka jingtreikam ki dkhot met bad mad ia ki jingeh kiba khraw namar ka jingpang kaba long na ka T.50,000 sha ka T.3 lak.
Nalor kane, u Myntri Rangbah ula pynbna ruh ia ka rai jong ka Sorkar ban buh ia ka corpus fund ba T. 35 lak ka ban aiti sha ka Committee kaba khlieh da u Commissioner & Secretary lane Principal Secretary, ki ban sa ai pura ia ka bor ba kin shimrai shimet ba kumno kin pyndonkam ia ka na ka bynta ka bha ka miat jong ki nongpathar khubor ha ka Jylla.
“Kane ka Committee kan dei ka lynti treikam ban wanrah ia ka jingiatreilang hapdeng ki lad pathai khubor bad ka DIPR-ngin don ia u Director bad kiwei ki Ophisar Sorkar nalor 2-4 ngut ki nongpathai khubor kum ki Dkhot” ula ong.
“Nga la rai ba ngin buh ia kaneka corpus funs ba T.35 lak ha kane ka committee mynta bad ngin sa nang thep pyndap ia ka pisa katba ka nang lut. Ngin pynlong ia ka kum ka kam ba hap leh manla u snem hynrei ai ba ka Kynhun Myntri kan mynjur” ula ong.
Haba kren halor ka matpdeng jong ka jingrakhe “Changing nature of the Press”, u Myntri Rangbah ua ban jur ia ka jingdonkam ban batai sha bha ia a jingapher hapdeng ka kam pathar khubor bad ka jingai jingtip ne ki khubor ba buh ha ki Social Media lane kano ka dei ka khubor kaba dei bad kano ka khubor kaba thok.
“Ngi iohi mynta ia ka jingiathew hapdeng ka kam pathai khubor bad ka jingai ia ki jingtip thohmut thohmat kiba mih ha ki social media lane whatsapp…ngam da tip bha ia ki daw, ki nongpule bad ki paidbah kim lah satia ban bishar kano ka dei ka khubor kaba shisha bad kano ka dei ka khubor lamler ha ki katto katne ki khep” ula ong haba bynrap “Namar kata, nga kyrpad ia ki lad pathai khubor, ki nongthoh khubpr ba kin hap ban pynthikna haka ban batai shai ia ka jingiapher jong ki khubor kiba shu ai jingtip thohmut thohmat bad ki khubor kiba dei ban leit sha u paidbah. Kane ka dei shisha ka kam kaba hap shimkhia bha bad mynta khamtam lei ngi kum ki riew sain pyrthei, ngi ju ong man la ka por ba ki briew ki kham sngeewbang ia kaei kaba wan na ki whatsapp ban ia aba pule ia kaei kaba don ha ka khubor, kaba dei ka kam ba pynsngewsih bha”.
“Kane ka dei ka jingtynjuh ba ngi mad bad kane ka dei ka jingkylla ha ka kam pathai khubor. Kam dei tang ia ki kam pathai khubor hynrei nga tharai ka dei ka jingpyntlot kaba phi iohi da ka jingwan ki technology” ula ong.
“Namar kata, kan long kongsan bha kum ka Pres Club, kum ka MEPA, kum ki Seng jong ki nongpathai khubor ba phi hap ban leh eiei bad iakren bad la ki jong ki kynhun ha kaban wad ia ki lad ki lynti ban pyniapher hapdeng ki khubor ba shisha bad ki bym dei” ula bynrap.
Ha kajuh ka por, u Myntri Rangbah ula kyntu ia ki nongpathai khubor ba kin wan shakhmat bad la ki jingai jingmut ki ban iarap ia ka Sorkar ban thaw ia ki Policy kiba donkam nalor ki ain kiban tehlakam ia kum kine ki kam.
