Shillong, Nailar 13 : U Myntri Rangbah ka jylla u Conrad K Sangma hynne ka sngi Balang ula pynbna ba ka sorkar kan bei haduh T.40 haduh T.45 klur ban pynbha bad pynitynnad ia ka Ìew donnam ka Ìewduh.
Haba kren ha ka jingialang buh maw nongrim jong ka wat baar jong ka projek kaba la bei tyngka da ka North Eastern Council (NEC) ha ka jinglut jingsep kaba T.14 klur ban pynbha ia ka Iewduh, u Conrad Sangma ula ong, “Nga ai khublei ia u Myntri ka sorkar pdeng uba khmih ia ka DoNER halor ka jingsbun ka jongu. Hadien ba ngi lah iakren bad u shaphang ka jingkongsan jong ka Iewduh, da ka jingkmen ula bhah ia ka pisa bad mynta ngi lah buh ia u mawnongrim ha ka wat ka baar ban pynbha bad pynitynnad ia ka projek ha iewduh.
“Ngi lah sdang ia ki kam jongka wat kaba nyngkong kaba T.5 Klur ban pynbha bad phi lah ban iohi mynta ba ngi lah wan jurip bad ngi lah khmih ia ki kam kiba la trei” ula ong.
U Myntri Rangbah ula pynbna ba ia ka detailed project report (DPR) ki dang pynkhreh na ka bynta ka wat ka balai kaban kot T.20 Klur.
“Kane ka mut ba baroh kan kot la jan T. 40 – 45 Klur ban pynlut na ka bynta baroh ki jingtei bad jingpynitynnad ia ka Iewduh,” ula ong bad ka kyrpad ia baroh 5500 ngut ki nongshong dukan bad ki nongdie madan kiba la rejistar bad ka Hima Mylliem ban pynneh ia ka jingkhuid jong ka Iewduh.
“Lada ngi baroh ngi iatreilang bad leh iala ka bynta, nga ngeit skhem ba ka Iewduh kan kylla long ka iew kaba itynnad ym tang ha Shillong hynrei ha ka thain shatei lammihngi baroh kawei. Kane kadei ka mishon ka jong ngi bad nga pan ia ka jingiasnohktilang khnang ba ngin lah ban pynurlong ia ka thong,” la ong u Myntri Rangbah.
U Sangma ula pynpaw ruh ia ka jingsngewkhia halor ka jingbym don ka roi ka par ha Iewduh bad ula ong ba watla ka roi ka par jong ka jylla kala iaid shakhmat hynrei ka Iewduh kam shym la don satia kano kano ka jingkylla mynta la jan 35 snem.
U Sangma ula banjur ba ka khana jongka jingkiew ka roi ka par kan ym long kaba pura khlem ka jingdon ka jingkiew ki nongdie madan, nongdie dukan, nongrep bad ki nongsengkam kiba trei shitom ban kamai jakpoh man la ka sngi.
Haba pynkynmaw ia ka jingleit jurip ha u bnai jymmang mynta u snem, u myntri rangbah ula banjur ba ki rai ban wanrah jingkylla yn ym lah ban shim da kaba shu shong hapoh ophis hybrei ka donkam ban sngewthuh bniah naduh tynrai ia ki jingeh bad ia ki jingiakhun.
