Tura, Jylliew 18: U Myntri Rangbah ka Jylla u Conrad K Sangma ula leit iashimbynta ha ka jingrakhe dap 33 snem ne ka 33rd Foundation Day jongka South Garo Hills District bad pynbna ia ka song pisa ba T.1800 klur ban theh sha ki kam pynroi ha kane ka District ba sahdien tam ka Jylla.
Ha kane ka jingialang la iadonlang ki Myntri Sorkar kiba kynthup ia u A.T Mondal, Shakliar Warjri, Marcuise Marak bad u Rakkam A Sangma, ryngkat bad ki MLA kiba kynthup ia u Sanjay Sangma, Kartus Marak, bad Sengchim Sangma bad u CEM ka GHADC u Albinus Marak.
Haba kren ha ka jingialang u Myntri Rangbah ula kren bniah halor ka jingshimkhia jong ka sorkar jylla ban kyntiew ia ka South Garo Hills.
Ula pyntip ha ka jingialang ba naduh u snem 2018, ki project kiba shongdor T. 1400 Klur la pyntreikam ha katei ka thain bad yn sa bhah T. 400 Klur lyngba ki scheme bapher bapher ha kine ki 2-3 snem kiban wan.
“Ha u 2018 ha ka jingleit jngoh ia ka Baghmara, Nga lah kular ba ngan leh ia kaba bha tam ban kyntiew ia ka South Garo Hills. Ngi lah dep ban lum ia ki sienjam ki bapher kiba dei ban leh na ka bynta kane ka thain bad ha kine ki 7 snem kiba la leit, ngi lah pyntreikam ia ki projek ki bapher kiba la kot sha ka T.1400 Klur”, ula ong.
Ula ong, ba ka sorkar kala phaikhmat bha na ka bynta ban kyntiew ia ka roi ka par ha ka thain bad ula ong, “Ka South Garo Hills suki kala sdang kylla, lyngba ki lad bad ki kabu kiba bun kiba la thaw na ka bynta ki trai shnong”.
Ula pyntip haba ka jylla kala pynkhreh ia kaban kynjoh 60 snem ia ka jingioh iala ka jong ka jylla, ka thong ka long ban pynthikna ba kan don ka roi ka par kaba kyllum ia baroh.
“Kadei ka por ia baroh ki district ba kin buh ia la ki jingthmu ban pynleit jingmut halor ki sienjam ki bapher bapher haba ka Meghalaya ka rakhe ia ka jingdap 60 snem ia ka jingioh ia ka jylla, kan don ka daw na ka bynta iwei pa iwei ban rakhe bad ban sngewsarong kum ki nong Meghalaya”, ula bynrap.
“Kaei ka jingpynleit jingmut jong ka Baghmara ban kyntiew ia ka kam ialehkai, ki jingshna ia ki jingtei ne ka khaii pateng, ngi hap ban don ia ka jingiohi jngai bad ban pynwandur ia ka” ula banjur.
“Lada ngi hap ban wanrah ia ka jingkylla ia ka Meghalaya, ka sorkar marwei kan ym lah ban leh ban pynkylla, hynrei man la ki nongshong shnong ki hap ban ia trei lang da ka mynsiem jong ka jingshimkhia lang” la banjur u Myntri Rangbah.
Haba kren shaphang ka jingkiew jong ka kam jngohkai, u Myntri Rangbah ula ong, “Ka sorkar ka don ban ai jingkyrshan ha kaba iadei bad ka kam jngohkai. Nga dap da ka jingkmen ban tip ba ki briew kila mih shakhmat ban sdang seng kam lajong bad buh ia ki Homestay ha Baghmara. Kane kadei ka jingsdang jong ka jingkylla ha ka ioh ka kot kaban pynthikna ia ka lawei jongki nongshong shnong” ula ong.
U Myntri Rangbah ula banjur ruh ia ka jingkongsan jong ka Carbon Credits bad ka kabu ia ka South Garo Hills ban ioh jingmyntoi na katei ka sienjam.
Ula kyntu ia ki trai shnong ba kidei ban iada ia ki khlaw ki btap, ki wah bad pynpaw ia ka jingriewspah jong katei ka thain ha ka jingdon ia ka mei mariang bad kane kadei ka lad kaban khring bha ia ki kompani ban pynduna ia ka jingpynmih ia ka Carbon.
U Myntri Rangbah ula pyllait paidbah ruh ia ka Meghalaya Economic Inclusive Program (M-EIP) bad CM Fellowship bad ula aiti ia ki Cheque sha ki nongioh jingmyntoi hapoh jongka MegCARE.
Ula buh ruh ia u mawnongrim na ka bynta ban tei ia ka Synthetic Athletic Track bad ia ka Building bathymmai jongka Captain Williamson Government Higher Secondary School.
Ha kane ka jingialang la aiti ruh ia ki syrnod sha ki skul kiba la lehbha bad sha ki khynnah pule ha ka eksamin HSSLC bad SSLC kaba dang shu dep.
U Myntri ka pule puthi u Rakkam A Sangma bad u Myntri ka tnad ialehkai u Bah Shakliar Warjri kila ai jingkren ha kane ka jingrakhe bad kila pynpaw ia ka jingshimkhia jong u Myntri Rangbah bad ka jingthrang na ka bynta ka jingkiew bad jingroi jong ka jylla.
U Ham Haverkort, Partnership Lead Asia, Rabobank Acorn, ruh ula ai jingkren ha kane ka jingialang.
Ha kane ka jingleit jngoh ia ka Baghmara, ula plie ia ka Prime Hub kaba dang shu dep ban tei thymmai bad ula leit ruh ban jngoh ia ka Baghmara Police Station ia kaba la dep ban shna pynbha bad pynitynnad lyngba ka Police Infrastructure Development Fund, ka prokram kaba la shimkhia hi da u Myntri Rangbah.
Ula ong ba ka sorkar kala pynleit jingmut bha na ka bynta ban tei ia ki jingtei khnang ba ka jingai jingshakri bad ka rukom treikam kan long kaba iaid ryntih.
