Shillong, Iaiong 07: U Myntri Rangbah ka Jylla u Conrad K Sangma hynne ka sngi Nyngkong, u la pynbna ia ka song pisa ba T.15 klur ban kyrshan iaka Seng Khasi Kmie, ba kan tei iaka Indigenous Cultural Centre ha Mawkhar.
U Conrad u la pynbna ia kane ha ka sngi kut jong ka Shad Suk Mynsiem ba lai sngi ha Madan Weiking bala pynlong daka Seng Khasi Kmie.
Haba kren halor ka jingdonkam ka Indigenous Cultural Centre u Conrad u la ong “Kumba ngi la ju pynpaw ngi donkam ban pynneh pynsah bad kyntiew iala ki kolshor, ki riti dustur, kumta ngi donkam ban don iaka Indigenous Cultural Centre jong ka Seng Khasi”.
U Conrad u la ong ba ka Sorkar kala mang T.15 klur ban tei ia ka Indigenous Cultural Centre ha Mawkhar bad ha u bnai Jymmang yn buh maw nongrim khnang ban ioh sdang noh iaka Project.
U la ong ba ka Indigenous Cultural Centre ha Mawkhar kan dei ka Project thymmai hynrei kin don ruh ki kam ban pynthymmai bad ïa kane ka Project yn tei daka pynshong nongrim bha ha ka teknoloji katkum ka juk mynta.
Haba iadei bad ka Madan Weiking, u Myntri Rangbah u la ong “Nga don ïa ka jingsngew shimet jong nga ba ngi lah ban pynbha ne pynthymmai iaka Madan. Nga sngew ba kane ka Madan ka don la ka jong ka jinglong kyrpang bad nga ïohi ki nongjongoh kai pyrthei ruh ki tuid bha ha kane ka Madan namar kata nga sngew donkam ban pynheh iaki jaka shong paidbah”.
U Conrad u la ong ba shen un sa ïakren bad ka Organizing Committee jong ka Seng Khasi Kmie ban iasyllok naka bynta ban iatreilang khnang ba lah ban pynbha ia ki jingtei ha Madan Weiking”.
Nalor kane u Myntri Rangbah u la ong ba ka jingkyrshan ka Sorkar Jylla kam kut tang iaka Seng Khasi Kmie hynrei kan iai bteng ban kyrshan ïa baroh ki jaitbynriew kiba don hapdeng ka jingthrang ban pynneh pynsah bad kyntiew iala ki kolshor bad riti dustur.
“Dang shen nga la don hapoh ka thain Karbi bad nga la pynbna ban iarap T.50 Lak na ka bynta ka Cultural Centre nalor kata nga la pynbna jingïarap ruh iaki jaidbynriew Rabha, Kooch bad Hajong” u la ong.
