Shillong, Iaiong 07: Ki shipai iada khappud Border Security Force kila kem ia u wei u briew uba dei na ka ri Bangladesh uba ju donkti ban pynrung tuh ia ki briew ha khappud.
La kem ia une u briew da ki shipai BSF Meghalaya najan ka khappud Indo-Bangladesh ha ka 6 tarik mynta u bnai Iaiong.
Haba bud ryntih katkum ki khubor syntiat, ki shipai BSF jong ka 4th Battalion, kiba don hajan Dawki kiba peitngor bha ha ka thain Dawki, kila ia shan khmat ia ka iaid ka ieng jong u hajan khappud Bangladesh.
Une u briew u la pyrshang ban kiar na ka jingshah peitbniah ha ryngkat bad ka jingpyrshang ban kam lsha shilliang pud, hynrei ki shipai BSF kiba la peitngor bha kila ioh bat noh ia une u briew ba ki suba.
Ha ka jingtohkit ba nyngkong, une u briew u la pynpaw ba u dei u nong Bangladesh, uba la tip kyrteng kum u Md. Ibrahim uba shong basah ha Sylhet district.
Kila pyntip ba une u briew u dei ruh u ba ju pynrung beain ia ki briew ban kam sha shilliang u pud u sam bad kiwei kiwei de ki jait kam ba long beain.
Hadien ka jingtohkit ki BSF kila aiti noh ia une u nong Bangladesh sha ki pulit ka Dawki Police Station ban dang pynlong shuh shuh ia ka jingtohkit pyrshah ia u.
