Shillong, Naitung 30 : U Myntri Rangbah ka Jylla Conrad K Sangma, ula pynbna ia ka song pisa ba palat T.260.45 klur, ban pyntrei ia ki project bapher bapher kiban pynkylla sur ia ka sor Tura baroh kawei.
U Conrad ula pynbna ia kane ha ka jingialang jong ka CM Connect bad ki nongshongshnong ka Tura Bazaar bad ki shnong ba marjan, kaba long ha ka sngi Balang ha Police Parade Ground, Tura, kaba la pynlong da ka Tura Municipal Board (TMB).
U Myntri Rangbah ula kubur ia ka jingkongsan ka synshar khadar ki shnong ki thaw bad kren ruh halor ki jingeh bala mad da ki paidbah. Ula ong “Ka jingialang ka dei kaba la pynwandur ban lah leh eiei halor ki jingeh jong ki paidbah bad ban pynbeit ryntih ia ki skhim pynroi na ka bynta ka North bad South Tura”.
Ha kane ka jingialang, u Myntri Rangbah ula ban jur ia ka jingkongsan ban iakren markhmat bad ki nongshong shnong ban lah leh eiei halor ki jingeh ba ki iakynduh. Ula ai ruh ia ka jingbatai kaba bniah halor ki project kiba la iaid bad kiba dang pynkhreh ba kot T.260.45 klur ban pynkylla dur ia ka Tura.
Kine ki project ki kynthup ia ka :-
• Additional Secretariat : Ka jingpynkhreh ban khot tender ia ka project ba T.160 klur kan sdang ha u Nailar 2025.
• Convention Centre: Lah mang T.52 klur, bad ka jingpyntrei ia ka kam kala iaid shakhmat.
• Hospitality Complex: Ka jingtrei ia ka jingtei kala sdang da ka jingmang ban pynlut ba T.15 klur.
Kum ka jingpynkhreh ia ka National Games 2027, u Myntri Rangbah ula pynbna ruh ia ka jingkynshew pisa ba bun bah ha ka jingshna ia ki madan ialehkai :
• PA Sangma Stadium: La mang T.127.7 klur
• Sports Hostel: Lah aiti ia ka Detailed Project Report ba T. 73.74 klur.
• PA Togan Athletic Stadium: Ka jingkyntiew kyrdan kala iaid ha ka jingmang pynlut ba T. 48.5 klur.
• Sunny Hills Indoor Hall: La plan ban shna ia ka madan ialehkai ba T.18.9 klur ban pynlong ia ki lympung ialehkai badminton bad tennis ha ka kyrdan International standard.
U Myntri Rangbah ula iai ban ia ka jingkut jingmut ban pynkylla dur ia ka Meghalaya lyngba ki kam bapher bapher, haba ban jur ia ka jingiohi jngai jong u ha ka ban wanrah ia ka jinglong jingman kaba lah ban leh eiei kat kum ka jingangnud u paidbah bad kyntiew ruh ia ka roi ka par kaba iai neh ha kylleng ka Jylla.
