Shillong, Naitung 30: U jumai ba kot haduh 8.8 magnitude u la khynniuh harud duriaw jong ka Russia ha Eastern Kamchatka Peninsula ha ka sngi Balang, kaba la pynlong ia ka Ri ban ai ka jingmaham ba lah ban khie ka tsunami ha baroh kawei ka Pacific.
Katkum ka US Geological Survey (USGS), ka Tsunami ka lah ban khie ha ki bynta jong ka Russia bad ha Japan hapoh ki lai kynta ki ban sa wan bad u jumai ba la buh jingthoh ba ka jingkhlain bor ka long 8.0 magnatude hynrei kham hadien pat la pynkylla sha ka 8.8 magnitude ka jingkhlain bor.
Kane ka jingkhie u jumai kala jia ha ka jingjylliew ba19.3 kilometer (12 mail) bad kaba la jia kumba125 kilometers (80 miles) ha east-southeast jong ka Petropavlovsk-Kamchatsky, kaba don harud duriaw jong ka Avacha Bay.
Katkum ki video ba la saphriang ha ki social media la iohi ia ka jingshyrkhei jong une u jumai. Ka jingioh ring dur napoh ki jaka sah briew la iohi ba ki tiar ki tar kila khyllem lut katba ki briew ki dang ialeh ban wad jaka rieh.
Na ka liang jong ki bor ba dei kmih kila buh ka jingmaham kaba khraw ia ki jaka ba marjan bad ki rud duriaw bad la buh ruh ia ki nongtrei kiba ai ka jingshakri ba kyrkieh bad ban pynkynriah ruh ia ki paidbah na ki jaka ba don jingma.
