Jan kot 10,000 kiba pang HIV/AIDS ha Jylla, haduh 982 ba ngat thymmai manla u snem
Shillong, Nohprah 19 : Namar ka jingnang kiew ha ka jingdon ki briew kiba kit ia u khniang jingpang HIV/AIDS ha Meghalaya, u Myntri Rangbah ka Jylla Conrad K Sangma ula pynbna ia ka prokram ba 5 snem kaba long ha ka dur jong ka Mission, ban iakhun pyrshah ia ka jingpang HIV/AIDS ha Jylla.
Kat kum ka jingong jong u, ka Sorkar kala mang na ka mang tyngka haduh T.25 klur sha kane ka Mission ka ban long T.5 klur ha ka shisnem.
Ia kane ka jingtyrwa la ai jingmynjur da ka Kynhun Myntri kaba la shong ia ka jingialang ba khatduh jong une u snem hynne ka sngi Thohdieng.
“Ha ka jingthaw jong ngi ia ka DREAM project….ngi sngewthuh ba ka don ka jingima ha ka jingkiew ka jingdon ki briew ba don jingpang HIV/AIDS ha Jylla. Kumta, ngi donkam ban wanrah ia ka prokram ha ka dur jong ka Mission….ban tehlakam ia kane ka jingkiew ki nongpang ha ka imlang sahlang jong ngi” ong u Conrad haba iakren bad ki lad pathai khubor.
“Ha kane ka mission ba 5 snem bala ai jingmynjur da ka Kynhun Myntri hynne ka sngi, ngi la mang ia ka mang tyngka ba kot T.25 klur, kata ka long T. 5 klur ha ka shisnem, ia kaban pyndonkam na ka bynta ki jingtei, ki jingialap bad kiwei kiwei ki prokram ban leh lyngba kane ka mission” ula ong.
U Conrad ula pynpaw ba kane ka rai jong ka Sorkar ka dei kaba la pynshong nongrim na ka jingima ka jinglong jingman bad ong “ka jingkiew jong ka HIV/AIDS ha Meghalaya kala nang kiew ha ki snem bala leit” haba pyntip ba ka jingdon ki nongpang mynta kila kot 0.43% kaba kham heh ban ia ka national average ba kot 0.21%.
Kat haduh u 2024, ula pyntip ba ki don kumba 9,589 ngut ki briew kiba im ha ryngkat ka jingpang HIV/AIDS bad kiba dang kem pang thymmai ruh ka heh bha, kaba kot haduh 982 ngut ha ka shisnem.
