Shillong, Risaw 30: U Myntri Rangbah ka jylla u Conrad K. Sangma hynne ka sngi Palei ula pynbna ia ka Chief Minister’s Mission ban don 100% ki painkhana ne Toilet, da ka jingthmu ban pynthikna ba man la ki skul ha ka jylla kin don ia ki painkhana ryngkat bad ka jingpynbiang ia ka um haba banjur ba ka pule puthi kala jam sha ka jingkylla ha ka lynti kaba janai bad kaba ryntih.
Haba kren ha ka jingplie ia ka MPOWER Education Conclave 2025, kaba la pynlong ryngkat bad ka tnad pule puthi, u Conrad Sangma ula ong ba ka sorkar kan ialeh ban ‘pynbeit thymmai ia ka rukom pyniaid’ ia ki skul bad ia ki jingdon jingem, ban pynduna ia ki kyrdan jong ki jaka pule bad ban buh ia u mawnongrim na ka bynta ka jingkylla kaban neh slem ha ka pule puthi.
Ka MPOWER Meghalaya kadei kaba la kyrshan da ka World Bank, kadei ka sienjam kaba la ialam da ka sorkar kaba la pynwandur ban kyntiew ia ka jinglong jingman, ban pynkup bor bad ka jinglong ki khynnah naduh 9-19 snem ka rta ban don ia ka jinglah ban iakhun.
“Kane ka mishon kan kynthup ia ki skul, college, hospital, ophis, jaka jngohkai bad ki jaka paidbah, ban pynthikna kan don ka jingbuh ia ki painkhana ha kylleng ki jaka bad ban ioh ia ka lad ban don ia ki painkhana kiba khuid ha kylleng ka jylla” ula ong.
U Myntri ka pule puthi u Bah Lakhmen Rymbui, u Chief Secretary u Dr. Shakil Ahammed, u Principal Secretary u Sampath Kumar, u Commissioner & Secretary u Vijay Kumar Mantri bad u Commissioner & Secretary R. Rapthap kila wan ban donlang ha kane ka jingialang.
Ula ong, ba kum ka sorkar bad kum ki nonghikai, ka jingpynleit jingmut kadei ban leit sha ki khynnah bad kane kan dei ban long ka bor kaban jam shaphrang.
Ula bynrap ba ka jingkylla ha ka pule puthi kan shim por hynrei ka long pat kaba kongsan ban wanrah ia ka jingkylla kaban neh shi rta.
“Ka pule puthi ka long kaba iar, ka jingmih jong ka jingkylla mynta ka lah ban shim por haduh 10 ne 15 snem ban urlong. Hynrei ka jingbuh ia u mawnongrim ban wanrah ia ka jingkylla kaban neh shi rta kadei kaba la dep ban buh” ula ong.
Ula kdew ba ka Meghalaya ka mad ia ka jingeh na ka jingdon 14,000 tylli ki skul bad ka jingdon bun jait ki kyrdan jong ki jaka pule, kumta ka long kaba donkam ban Rationalise ne ban buh ryntih.
U Conrad Sangma ula kdew ruh shaphang ka MPOWER program, kaba la kyrshan da ka World Bank, kan shimkhia ia ka jingeh kaba mad da ki khynnah kum ka jingiehnoh ia ka jingpule, ka jingpun khun ki khynnah bad ka jingpyndonkam ia ki jingdih kiba sinew da kaba iakhun ia ka jingsngew, ka met bad ia ki bynta kiba ia dei bad ka bor pyrkhat pyrdain.
U Myntri Rangbah ula ong ba ka sorkar ka dang trei ia ka bynta ban thaw ia ka rukom treikam kaba ryntih ia ki nonghikai SSA bad Ad-hoc ban pynthikna ia ka jingshngain ka jingtreikam.
Ha kane ka jingialang ka baar sngi yn pynleit jingmut ruh ha kaba iadei bad ka jingpyntreikam iaka NEP 2020, jingai jinghikai ia ki nonghikai, jingpynbeit ryntih ia ki skul, PM POSHAN, PM SHRI bad ka bynta jongki lad pyniasoh ha ka pule puthi.
