Haduh 10,000 ki Nonghikai na ki SHG kin kyrshan ia ki kam ki ECD Centre
Tura, K’lyngkot 26: U Myntri Rangbah ka Jylla Meghalaya u Conrad K Sangma u la pyntip ba ka Jylla ka la thaw ïa ka Meghalaya Early Childhood Development Mission kaba pynleit jingmut ha ka jingroi ba pura jong ki khynnah (naduh ba dang kha haduh 8 snem) bad ki longkmie ba armet/ba ai buin, da kaba pynsan ïa ki jingtbit ban ïaid, ka jingroi ka bor pyrkhat, ka koit ka khiah, ka jingbam tei met, bad ka jinghikai naduh dang khynnah.
Haba kren ha ka jingrakhe Republic Day ba 76, u la ong, “Ngi thmu ban kyntiew kyrdan ïa ki Anganwadi Centre sha ki Saksham Anganwadi na ka bynta ka jingsumar bad jinghikai ïa ki khynnah rit kiba mynta bad ban ai jinghikai ïa ki 10,000 ngut ki nonghikai na ka kynhun SHG ba kin kyrshan ïa ki kam jong ka ECD Centre bad ban buh ïa ki Anganwadi Centre kiba thymmai ha ki skul primary sorkar na ka bynta ban pyntreikam ia ka NEP . 2020”.
Haba kren halor ka jinghiar ka jingïap jong ki longkmie ba kha khun da palat 53% bad ka jingïap jong ki khunlung ba dang kha da 40% ha kine ki san snem ba la dep, u Myntri Rangbah u la ong, “Ki jingkha khun ha ki jaka sumar jong ngi ki la nang kiew bha namar ka jingïarap hapoh ka skhim Chief Minister Safe Motherhood Scheme, ha kaba palat 3 Lak ngut ki longkmie kiba armet ki la ioh jingmyntoi na ka jingleit buh leit shaw, ka jingpeit bniah bad ka jingshakri ban pynkha khun. Ngi shim ïa ki jingshakri ha ka koit ka khiah kham jan sha ki paidbah da kaba pyntreikam ïa ki First Referal Unit ha ki Community Health Centre”
U la pyntip ruh b aka Sorkar kala dep kyntiew kyrdan ia ki CHC sha ki FRU thymmai ha Bhoirymbong, Resubelpara, Ranikor, Mawphlang bad ha Pynursula. Haduh 65 tylli ki Sub Centre thymmai la lah ban pyndep ha kane ka shisnem ba la dep, bad ka jingthmu ka long ban pyndep ia ka jingtei sa 90 tylli ki Sub Centre thymmai ha kaba kut jong u snem 2025.
U la ong ba ka tnad ka koit ka khiah ka la pynroi ia ka jingiatreilang bad ki tnad jong ka pyrthei ban wanrah ia ka jingnang jingstad, ka jingtbit, bad ka jingbei tyngka ha ka tnad ka koit ka khiah ha ka jylla.
“Ka MHIS ka la ïohi ïa ka jingbun tam ki jingkam pisa ha une u snem ba la dep kaba pyni ïa ka jingshaniah ha ka rukom treikam. La buh ruh ia ki Medical College ha Shillong bad ha Tura ryngkat ka plan ban shim 100 ngut ki samla pule MBBS ha ka shisnem ha kawei pa kawei ka kolej. Ka Shillong Medical College kan sdang treikam naduh mynta u snem”, u la bynrap.
Halor ka pule puthi, u la ong ba ka sorkar ka angnud ban pyntikna ia ka jingpule kaba kham bha bad ban kyntiew ia ka pule puthi ha ka jylla Meghalaya. Khamtam eh da kaba pynleit jingmut ban kyntiew ïa ka jingpass bha ki khynnah, ka sorkar ka la sdang ïa ka buit thymmai ban sam ïa ki guide book lyngba ka ‘CM IMPACT’ na ka bynta ki khynnah skul bad kumjuh ruh ki nonghikai.
“Mynta u bnai ngi la plie ïa ka University ba nyngkong eh ka Jylla-ka Captain Williamson Sangma State University. Ka University Grants Commission ka la ithuh ia ka jingseng ia kane ka University katkum ka section 2(f) jong ka UGC Act, 1956. Ka jingiasoh bad ka skulbah jong ka jylla kan pynthikna ba ki samla pule kin nym donkam ban leit iakhun ia ka eksam Common University Entrance Test (CUET) na ka bynta u snem 2019.
