Shillong, Risaw 24 : U Myntri ka Tnad Arts & Culture Bah Sanbor Shullai ula pynbna ia ka jingthmu ban pynieng biang ia u mot bas hi ryngieng jong u Tirot Sing Syiem, u nongiakhun laitluid, ha Dhaka, Bangladesh.
Haba kren sha ki lad pathai khubor, u Bah Sanbor ula pynpaw ba u don ka jingthmu ban iakren ia kane ka kam bad ka Indian Embassy ha Bangladesh, ban peitthuh ia ka jinglong jingman bad ban pyntip ia kaei kaba lah ban leh hadien.
“Ngin sa iapeit bad nga hap ban iakren bad ka Indian Embassy” ula ong.
U Myntri ula pynpaw ia ka jingsngewsih halor ka jingjia ba dang shen ha kaba la pynpra ia u mot u Tirot Singh da ki paidbhur ha Dhaka. Kat kum ka jingong jong u, ka jingpynieng ia une u mot ka dei kaba u dalade ula shimkhia ha ka por ba u bat ia ka kam Myntri ka tnad Arts & Culture ha ka Sorkar MDA-I.
Ula pynrem jur ia kane ka jingpynpra mot bad ong ba ki paidbhur kim shym la map wat ia u mot jong u Kpa ka Ri ha Bangladesh.
U Myntri ula iakren ia kane ka kam bad u Commissioner & Secretary Bah F Kharkongor bad thmu ban leit hi dalade sha katei ka jaka ban peit ia ka jingshna biang ia u mot ba shi ryngieng u Tirot Singh.
“Ngan sa pynbeit ia ka por bad ngan sa leit dalade sha kateu ka jaka namar ngi hap ban shna biang ia u mot bas hi rynieng jong une u nongiakhun laitluid” ula ong.
