Pynlait u CEO ia ka Electoral Literacy Club ha JNV, Mawphlang

Shillong, Lber 05: U Chief Electoral Officer (CEO) ka Jylla u Dr BDR Tiwari u la pynlait ia ka Electoral Literacy Club ha Jawahar Navodaya Vidyalaya Mawphlang da kaba kyntu ia ki samla pule ban pynskhem ia ka thong jong ka SVEEP kata ‘Ym dei ban don ki nongthep vote ki ban shah ieh shadien”.

U Tiwari u la ong ba ki samla ki dei ki paia ban pynkhlain ia ka synshar paidbah kaba heh tam ha ka pyrthei.

“Ki samla ki mihkhmat ïa ka lawei jong ka ri India” u la ong ïa ki samla pule, da kaba bynrap ba ïa ka hok thep Vote la pdiang ha ka por ba la ïoh ïa ka jinglaitluid slem bha shwa ba bun ki ri synshar paidbah kiba la rim kin pynïar ïa kajuh ka hok sha baroh.

U la pyniadei ia ki riti dustur jong ka ri bad ki riti dustur jong ka thaiñ shathei lammihngi, kaba kdew ia ki rukom treikam kynthup ia ki Dorbar Khasi, ki Syiem bad ki Dollois kiba la ithuh hapoh ka khyrnit kaba Hynriew kum ki nuksa jong ka sain pyrthei kaba iashim bynta kaba u la iohi nyngkong eh haka por ba u don ha Sohra.

U Tiwari u la kyrpad ia ki dkhot jong ka ELC ba kin khein ia ka synshar paidbah kum ka jingsngap ha ryngkat ka jingkren.

“Ka jinglong nongialam ka donkam ia ka jingshaniah ban burom ia ki jingmut kiba iapher.”
U Tiwari u la pynshlur ban pyndonkam ia ka ECINET app na ka bynta ki Form 6, 7 bad 8 bad u pynshai ia ki samla pule shaphang ka jingpynkylla kyrpang ia ki thup nongthep vote, da kaba ong ba ki Volunteer jong ka ELC ki lah ban iarap ia ki paidbah ban sngewthuh ia ka jingpynshisha khlem jingtieng.

La pynlong lang bad ka ophis Deputy Commissioner bad ka Navodaya Vidyalaya Samiti, ha kane ka jingïalang la don lang Principal ka skul u Dr N Sharma, u nodal officer ka SVEEP u K G Nongrum lem bad kiwei kiwei de.

Ki ophisar ki la ong ba ki residential skul kum ki JNV ki lah ban long ka nuksa (model) jong ki kam haba iadei bad ki ilekshon, ha kaba la thmu ia ka Mawphlang kum ka nuksa na ka bynta kiwei pat ki jaka pule ha East Khasi Hills.