Shillong, Jymmang 27 : U Myntri Rangbah ka Jylla Conrad K Sangma ha ka sngi Balang ula pyntip ba ka Sorkar Jylla kala ai jingmynjur ia ka thup bala pynbeit ryntih na ka bynta ban pyndait ia ki ‘Name Plate’ ne ‘Name Board’ ha ki kali Sorkar kum shibynta na ka jingialeh pyrshah ia ka VIP Culture.
Haba kren sha ki nongthoh khubor hadien ba dep pyniaid ia ka jingialang jong ka Kynhun Myntri, u Conrad ula ong b aka dei shibynta jong ka sienjam ka Sorkar ban ialeh pyrshah ia ka kolshor ka jingleh baheh ne sngew heh sngew hain.
“Ka jingpynbna kaba ar ka dei ka jingpynbna kaba suk bha, ka dei ka jingteh kyndon ia ka jingpyndonkam ia ki Name Board ha ki kali Sorkar” ong u Conrad.
“Lada phi kynmaw, ngi lah wanrah ia ka SOP ha kaba ngi la kren halor ki siren bapher bapher, ki jingpyndait light bad kiwei kiwei kiba ngi sngewkhia bha haduh katta katta” ula ong.
U iathuh ba ka Tnad Transport kala dep shim rai ia kiei kiba lah ban pyndait ia ki name board bad kumno ki dei ban paw ha ki kali.
“Ka Tnad Transport kan sa batai ba ianp la shah ban pyndonkam ia ki name board bad ka Tnad mynta ka sngi kala aiti ia ka thup ki briew, ban ia ka kyrdan, kiba lah ban pyndait ia ki name board bad kumno ka dei ban long kane ka name board” ong u Conrad.
U Myntri Rangbah u pyntip ba kane ka thup bala ai jingmynjur ka kyntnup ia ki tnad bapher bapher jong ka Sorkar ba kynthup ia ki Heh Ophisar kiba bat ia ki kyrdan bapher bapher ha ka Sorkar, bad ki Iingkashari bad ki kyrdan bala ithuh da ki ain na ka Sorkar Pdeng.
