Shillong, Naitung 25 : Ka All Meghalaya SSA Non Teaching Staffs Association (AMSSANTSA) ha ka sngi Palei, kala pynbna ban pynlong ia ka jingiashong kyllain mungor ba khlem buh pud naduh ka 29 tarik Naitung tad haduh ba ka Sorkar Jylla kala kloi ban pyndep ia ki jingkular ban kyntiew ia ka tulop ki Nongtrei SSA-Non-Teaching Staff ha Jylla.
Ka kyrwoh bala pyllait da ka Association ka pyntip ba ia kane ka rai la shim ha ka jingialang kaba long ma madan Malki hynne ka sngi.
“Ngi la iarai lang ban pynlong ia ka jingiashong kyllain mungor ba khlem buh por naduh ka sngi Nyngkong ban wan (29 tarik Naitung) tad haduh ba ka Sorkar kala kloi ban pyndep ia ki jingkular ban kyntiew ia ka tulop jong ngi, kaba la sahteng naduh u snem 2016” kala ong.
Kine ki non-teaching staff ki kynthup naduh kito kiba trei ha ki cluster, block, district bad ha Jylla kiba hap hapoh ka Ophis jong ka Samagra Shiksha Abhiyan, State Education Mission Authority ka Meghalaya.
Ka Association kala pynkynmaw ruh ba u Myntri ka Tnad Pule Puthi Rakkam A Sangma ha ka jubab hapoh ka Iingdorbar Thaw Ain ha u 2023, ula pyntip ba ka Tnad kala dep phah ia ka file ba iadei bad ka jingtyrwa ban pynkiew ia ka tulop ki SSA Non-Teaching Staff sha ka Tnad Finance hynrei sngewsih ba haduh mynta ym pat shym la leh eiei halor kane ka bynta.
“Kane ka pyni shai ba u (Rakkam) ula shu kular thok tang ban pynbiej ia ki dkhot jong ka Iingdorbar Thaw Ain. Hynrei, ki Non-Teaching Staff ki long kiba la pynkhreh ban iakhun iala ka jong ka hok” kala ong haba bynrap ba kane ka jingiashong kyllain mungor ba khlem buh por kam dei satia ban iakhun pyrshah iaka Sorkar Jylla hynrei ka dei tang ban dawa ia la ka jong ka hok”.
