Tura, Risaw 30 : Ki MP ka Iingdorbar Parliament shen kin sa sakhi ia ka sur jong ki lak ngut ki briew kiba kwah ban iada iala ka snap kyrpang bad ba dawa iala ka jong ka Jylla kynthup ka Garoland, ki ban sa tur sha Delhi ha u Nohprah ban iaid paidbah sha ka Dorbar Tlang jong ka Iingdorbar Parliament.
Ia kane ka rai la pynbna sha ki paidbah nongkyrshan Garoland ha ka jingiaid rally ba long hynnin ka sngi saitjain ha Tura, kaba la wan iashimbynta da ki Nongialam jong ki State Demand Committee na ki Jylla bapher bapher.
La pyntip ba kane ka rally ha Nongbah Delhi kan long haduh arsngi kynthih ban pynbor ia ki Nongthaw Ain ka Ri ba kin sngap lang ia ka jingdawa bala slem bha jong ki-kata ka long ban ai Jylla noh la ka jong kynthup ia ka Garoland.
Ia ka rally dawa Garoland la pynlong da ka Garoland State Movement Committee kaba ialam da u Nikman Ch Marak bad ki Nongialam na ka Natonal Federation of New States, ka synjuk ki kynhun na kylleng ki Jylla ka Ri kila wan ban iadonlang.
Ki Nongialam na ka Gorkhaland, Tripura, Karbi Anglong bad Telengana kila wan poi ha Tura ban iashimbynta ha kane ka jingialang paidbah kaba long ha madan ialehkai ka Teteng Aja Government College ia kaba la pynbud da ka rally kaba iaid lyngba ka AOC, Hawakhana bad lad Circuit House.
“Ka kynhun na Garoland, Gorkhaland, Bhundelkhand, Ladakh, Vidharba, Bodoland, Karbi Anglong bad Tipraland kin sa hiar sha Delhi ha ka sien long Dorbar Tlang jong ka Iingdorbar Parliament ban long ha u bnai Nohprah. Ngin pynlong ia ka rally ba arsngi ban pynkynmaw ia ki nongialam na India halor ka jingdawa jong ki paidbah kaba iaid kat kumka riti synshar ka Ri” pynbna u Dr Munish Tamang, President ka National Federation for New States (NFNS) uba mihkhmat ia ka Gorkhaland ha North Bengal.
U Nikman Ch Marak, uba dei u Deputy Chief Executive Member (CEM) ka Garo Hills Autonomous District Council (GHADC) ba mihkhmat ia ka party Garo National Council (GNC), kaba dei ka party riewlum kaba rim duh jong ki paid Garo bad kaba la ieng ban dawa Jylla Garoland.
U Nikman ula ialam ia ka rally ha Tura bad pynpaw ba ka jingmih jong ki nongkyrshan ban iaid rally ka pyni shai ia kajingkwah jong ki paidbah iala ka jong ka Jylla. Ula kular ban bteng ia ka jingiakhunban ioh ia ka Jylla Garoland naba ka dei ka jingdawa kaba don hok kumba kwah da ki paid Garo.
Ki Nongialam na ki Jylla bapher bapher ka Ri kiba la wan iashibynta ha ka rally dawa Garoland ki kynthup ia u Dr. Munish Tamang, President ka National Federation for New States (NFNS), u P. Niroop Reddy, Adviser ka NFNS bad Senior Advocate ka Supreme Court ba mihkhmat ia ka Telengana state, u Stalin Engty, Secretary ka NFNS na mihkhmat na karbi Anglong (Assam), bad Sukla Charan Noatia, Assistant General Secretary ka Indigenous People Front of Tripura.
Ki Nongialam na Ri-lum Khasi bala ialam da u President ka Hill State People Democratic People Bah K.P. Paniang, President ka HITO, Shillong bad na Ri-lum Garo pat ki kynthup ia u CEM barim ka GHADC Purno K Sangma bad Deputy CEM Augustine Marak.
