Shillong, Risaw 30: Ki runar ki bym lah ban tip ki dei kiei, kila kawang maw ia ka bos ba kit ia ki nongkyrshan jong ka National People’s Party (NPP) kiba dang wan na ka jingialang ba long hynnin ka sngi saitjain ha Jongsha.
Kane ka jingjia kala jia ha ka por 6 baje janmiet hadien ba ka NPP kala pynbna ia u Bah Kansing Lynshiang kum u kyrtong ban aireng ha ka elekshon MLA 2023 na Mawkynrew Constituency.
Ka Mawkynrew Constituency ka dei kaba la mihkhmat da u MLA ka Peoples Democratic Front (PDF) bad Myntri Sorkar Bah Banteidor Lyngdoh.
Ka khubor ki Pulit ka iathuh ba kane ka bos ka dei kaba kit ia ki nongkyrshan u Bah Kansing kiba dei na Thangsning Mawsam. Katba ki dang leit phai shala iing, arngut ki runar kila kawang maw ia ka bos ba ki shong ha Jongksha Dong Mission.
U Bah Kansing u pyntip ba ka Party kan ym ujor FIR satia pyrshah ia kitei ki runar namar ba kim tip satia ia kaei kaba ki leh.
