Shillong, Kyllalyngkot 09: Ka seng United Democratic Party hynne ka Lah Sngi u Blei kala pynbna iaka kyrteng jong ki 2 ngut ki kyrtong kiban iakhun iaka elekshon na Tura.
U General Secretary ka UDP u Dr Jemino Mawthoh ula pynbna ba u John Leslee Sangma uba long u MLA barim yn iakhun na South Tura Constituency bad ka Dr Pilne A Sangma na North Tura Constituency na Ka seng UDP ha ka elekshon MLA 2023.
Ia kine ki ar ngut ki kyrtong la pynkup burom da u President ka UDP Bah Metbah Lyngdoh ha ryngkat la jingdonlang u Working President bah TW Chyne, u MLA ka UDP Bah Kyrmen Shylla bad kiwei kiwei.
U Bah Metbah ula ong, ha ka wat kaba nyngkong ka UDP kala pynbna iaka kyrteng jong ki 32 ngut ki kyrtong kiban iakhun elekshon ha ka wat kaba nyngkong bad mynta haba kyllum lang baroh ki kyrtong kiban aireng na ka UDP ki long 34 ngut.
U President ka UDP ula ong, shen ka seng kan sa pynbna sa iaka kyrteng jong ki 5 ngut ki MLA kiban wan pyniasoh noh bad ka UDP.
Ula ong, ka UDP kan ym iateh lok bad kino kino ki seng ha ka jingiakhun iaka elekshon MLA 2023 bad u khmih lynti ba ki paidbah kin pynjop iaki kyrtong ka UDP ban ioh ialam iaka sorkar.
