Shillong, Naiwieng 29 : Ka Sorkar Meghalaya Democratic Alliance (MDA) hynne ka sngi ba-ar kala pynbna ban pynieng ia ki Border Outpost ha ki 7 tylli ki jaka khappud ba jur ka jingiakynad bad ka Assam.
Kane ka rai kala mih na ka jingialang jong ka Kynhun Myntri kaba la rai ruh ban pynthikna ba kine ki Border Outpost kin dei kiba biang nadong hadong bad kin don ia ki bor Pulit kiba khlain ban ai jingiada ia ki paidbah ha Khappud.
“Ngi la rai bad mynjur ban pynieng haduh 7 tylli ki Border Outpost ha ki jaka ba jur ki jingiakynad bad ban kyntiew kyrdan ia ka Police Outpost ha Patharkhmah bad ka Kyrshai kiba hap ha Ri-Bhoi bad West Khasi Hills District” pyntip u Conrad haba iakren bad ki lad pathai khubor hadien ka jingialang.
Kine ki 7 tylli ki BOP ki kynthup ia ka Muriap ha East Jaintia Hills, ka Mukroh bad Tiwieh ha West Jaintia Hills, ka Rani (Jirang) ha Ri-Bhoi bad ka Umwali, Lejadubi bad Langpih ha West Khasi Hills District.
Cabinet approved the creation of outposts in sensitive locations in Meghalaya along the border areas viz:
1 Mooriap BOP in East Jaintia Hills
2 Mukroh BOP & Tihwieh BOP in West Jaintia Hills
3 Rani-Jirang BOP in Ri-Bhoi
4 Umwali BOP, Lejadubi BOP & Langpih BOP in West Khasi Hills pic.twitter.com/dI0HZWu1o8— Conrad Sangma (@SangmaConrad) November 29, 2022
Ka Sorkar kala rai ruh ban mang ha kaban pynieng ia kawei ka Police Outpost ha Athiabari, West Khasi Hills District.
Kane ka rai jong ka Kynhun Myntri kala mih hadien ka jingshah ther kuli ki riew paidbah ka shnong Mukroh, West Jaintia Hills, ha ki Pulit ka Assam myn ha ka 22 tarik Naiwieng ha kaba haduh 6 ngut ki briew kila kyllon iap.
U Myntri Rangbah u pyntip ba ka jingpynlut ia kawei pa kawei ka BOP kan long kumba T. 2 klur shisnem. “Kan long kumba T. 14 klur shisnem ia ki 7 tylli ki BOP bad kumba 3-4 klur ha kiwei kiwei ki jaka. Ngi khmih lynti ba ka jingpynlut kan long kumba T. 17-18 klur shisnem” ula bynrap.
Suggestions had also come for Ri Bhoi District bordering Block 2, but we had to review with local communities to ensure we get the correct locations. Have asked DGP @MeghalayaPolice to visit the areas and come up with the proposal for the areas of difference in Block 2.
— Conrad Sangma (@SangmaConrad) November 29, 2022
Haba phai sha ka Block-II, Ri-Bhoi, u Myntri Rangbah u pyntip ba ka Sorkar kan hap ban iasyllok shuwa ba ki trai shnong ban ioh ia ka jaka kaba paka bad yn sa pynmih ia ka thup kyrteng jong ki Shnong hadien ka jingwad bniah.
“La bthah ia u Director General of Police ba un leit iuhkjat ha ki jaka ba iakynad ha Block-II bad ban wanrah ia ka jingtyrwa. Ka thup ba-ar jong ka Ri-Bhoi kan sa mih hadien bala dep wad ia ki jingtip kiba bniah” ula ong.
U Myntri Rangbah u pyntip ruh ba kine ki BOP kin don ha ki jaka ki bym hap satia ha ka jingiakajia. Kine ki jaka kin dei kiba markhap kiba la don lypa ki Pulit bad kan long kum ka jingkyntiew kyrdan.
Kum ka nuksa, ka Assam kala don ia ka BOP hynrei ka Meghalaya ka don tang ia ka Anti-Dacoity Camp ha Langpoh bad ia kane yn kyntiew kyrdan noh sha ka BOP. Da kaba leh kumne, ki Pulit na baroh ar Jylla ki lah ban iakren iakhana bad iapynbeit ia ki jingeh ba don ha kine ki jaka.
“Kine ki sienjam ki long kiba donkam ban shim ban lah wanrah pat ia ka jinglong jai jai bad ka jing sngewshngain jong ki paidbah hala ki jong ki shnong” ula ong.
Halor ka jingawa ban pynkhia noh iala ka jong ka IPS Cadre, u Conrad ula pyntip ba ka Sorkar Jylla kan sa nang iai tynruh sha ka Sorkar India halor kane ka kam.
“Nga la kren la bunsien sha ka Home Ministry bad nga la ju kren ruh ia kane ha u Myntri Rangbah Duh ka Ri bad kila pyntip sha nga ba ki dang khmih bniah ia ka kam. Ngin dang iai tynruh ia ka Sorkar India ba kan dei na ka bynta ka jingbha jong baroh artylli ki Jylla ba ngin don noh la ki jong ki cadre” ula ong.
