Shillong, Jymmang 16 : Ka National Testing Agency (NTA) kala pynbna ban buh sa lai tylli ki Examination Centre ba thhymmai ha Shillong na ka bynta ban pyniaid beit iaid ryntih ia ka eksam Common University Entrance Test (CUET-UG), 2025.
Kine ki centre thymmai ki kynthup ia ka St.Mary’s Higher Secondary School ka ban don 70 computer nodes, Shillong College-100 computer nodes bad ka Shillong ITI-29 computer nodes.
Ia kane la pyntip da u Commissioner & Secretary ka tnad Education Vivay Kumar Mantri hynne ka sngi Thohdieng.
“Ka Sorkar Jylla kala ai ka jingiatreilang bad ka NTA ban pynbun ia ka jingdon ki Exam Centre na ka bynta ki test ba leh da ki kor Computer. Ka NTA kala shimkhia bha ia kane bad kala ai ka jingiatreilang kaba iajan bha bad ka Sorkar ban pynthikna ia ka jingpyntreikam kaba iaid beit iaid ryntih” ula ong.
Kat kum ka jingong jong u, kine ki Centre ba dang thymmai kin dei ki jaka thoh eksam jong kito ki samla pule kiba shah pynngat kham hashuwa ba kin leit hoh eksam sha ki jaka kiba jngai.
Kat kum ka jingtip ba ioh khatduh na ka NTA, haduh 11,309 ngut ki samla ki dei ban iakhun ia ka eksam ka ban sdang naduh ka 19 tarik Jymmang. Na kine, tang 1376 ngut ki samla kila ioh thoh eksam ha ki centre ha Guwahati bad kiwei pat, kin sa ngat noh mynta ha ki centre ha Meghalaya.
“Kyllum lang, ym don shuh ki samla pule na Meghalaya kiba hap ban leit shabar ka Guwahati ba kin iakhun ia ka eksam CUET-UG. Baroh ki samla kila ngat mynta ha ki Centre ha Shillong, Tura lane Guwahati ka ban sdang naduh ka 19 tarik Jymmang. Ia kane ka jingbujli ia ki centre la dep ban pyntip sha ki samla pule da ka NTA lyngba ka email bad ki message” ong u Mantri.
