Shillong, Risaw 31: Ka Seng National Peoples Party hynne ka sngi kala pdiang burom ia u Bah Allan West Kharkongor uba la wan ban pyniasoh bad ka NPP bad ban iakhun iaka elekshon MLA 2023 na Sohra Constituency.
Today we welcomed Shri Allan West Kharkongor to the NPP family. As our candidate for the 28- Sohra Constituency, Bah Allan is committed to continue working for the Sohra people under the leadership of the NPP. I congratulate and wish him the best! pic.twitter.com/DoHXeqDR1z
— Conrad Sangma (@SangmaConrad) October 31, 2022
La pdiang sngewbha ia u Bah Allan West da u National President ka NPP Conrad K Sangma bad u National Vice President u Bah Prestone Tynsong, u President ka NPP Meghalaya u Dr WR Kharlukhi bad ka kyrtong ka NPP na Shella ka Kong Grace Mary Kharpuri bad kiwei kiwei.
U Conrad Sangma ula ong, ba ula ap ia kane ka khyllipmat la slem bha ba u Bah Allan yn pyniasoh bad ka NPP bad ula iatrei ryngkat bad u Bah Allan ha kiba bun ki bynta bad kila ia long paralok la slem bah bad kaba kham sngewtynnad ka long ba u la don ruh iaka jingiajan bad u (L) PA Sangma.
“Ha ka jingiatreikam ka jong nga bad u Bah Allan, nga shem ba u long u briew uba stad bha, uba trei shitom bad uba sngewrit bad u don ruh ia ka jingmut jingpyrkhat kaba shai kdar ia kaei kaba u kwah ban leh bad haba u rai ban leh ia kano kano ka kam u da trei 100 na ka 100” ong u Conrad bad ka bynrap ba ka long ka jingkyrkhu iaki paidbah ka Sohra bad iaka NPP ban ioh ia u Bah Allan uba la pyni iala ka jingstad la ka long ha kano kano ka khep.
Ula ong, ka shnong Kongthong kala pawnam kadei namar u Bah Allan bad wat iaka jingdawa District iaka Sohra ruh kadei kaba lba angnud bha da u Bah Allan bad ula pynkhreh ia ki kot ki sla, bad iatai bad baroh kiba don bynta ha kaba ula wan ialam ruh iaka SDDF sha ophis ban iakren halor ka jingdawa district.
U Bah Prestone Tynsong ula ong ka jingwan pyniasoh u Bah Allan kan ai mynsiem iaka seng NPP bad kyntu ia ki nongialam ba kidei ban pynsaphriang iaka khubor ban sa iohi ia ka dak ba kan don ka jingkylla hapoh Sohra bad Shella.
Ula ong kumta ka por kala dei ban jied noh iaki kyrtong ka NPP ban iohi iaka jingkylla namar ha katei ka thaiñ Sohra & Shella ka dei ka pliang ksiar hynrei kan shong sa tang ha ka jingnang jong ki paidbah ban pyndonkam iaka.
“Ngi na ka seng ngi sngewkmen bha, ba uwei na ki riewshemphang ula wan pyniasoh bad ka seng bad nga ngeit skhem ba u Bah Allan udei uwei uba shemphang bha haka liang jong ka kam jngohkai bad dei ka kynhun jong u, kiba la seng iaka MTDF bad kiba ai mynsiem ia ki khun samla ban kyntiew ia ki kam jngohkai ha ka thaiñ Sohra, Pynursla bad kiwei kiwei ki jaka ban iohkam iohjam” ong u Bah Prestone.
Ka Kong Grace Kharpuri kala ong ba u Bah Allan ula trei shitom bha ha kaba iadei bad ka jingpynlong ka KHADC iaka Monolith Festival, ban kyntiew iaki kam jngohkai ha ka jylla bad ban dawa District na ka bynta ka Sohra, ka mat kaba iadei bad ka MCCL bad kumta ter ter.
U Bah Allan ula ong, ba ym ju pyniasoh klumar bad kano kano ka seng Saiñ Pyrthei bad ula rung haka seng NCP namar ba u itynnad iaka rukom treikam jong u nongialam ka ri u (L) PA Sangma uba la wanphai biang sha ka kam saiñ pyrthei jong ka jylla da ka jingthmu ban kyntiew iaka jylla Meghalaya bad ula don ruh iaka thong ban pyniatylli ia ki riewlum kiba don hapoh ka ri India.
U Bah Allan ula ong, ka daw kaba la pynlong ia u ban pyniasoh bad ka NPP kadei namar ka jingiohi ba kane ka sorkar kala leh ia ki kam kaba kiwei pat kim shym la la lah satia ban leh eiei la kadei ka jingpynbeit ia u pud u sam, ne ka jingshna pyndep iaka Crowborough bad kiwei kiwei.
