Shillong, Risaw 31: Ka National People’s Party (NPP) kala dep ban ithuh haduh 58 ngut ki briew kiba lah ban long ki kyrtong ban iakhun ia ka elekshon MLA-2023 hapoh ka Jylla.
“Ngi la ithuh haduh 58 ngut ki briew kiba lah ban long ki kyrtong jong ngi na ki 60 tylli ki Constituency bad kane ka dei kaba bha palat haba ianujor bad ka elekshon bala dep” ong u National President bad Myntri Rangbah ka Jylla Conrad K Sangma ha ka jingialang pdiang burom ia ka jingwan pyniasoh u Bah Allan west sha ka NPP.
U Conrad ula ong ba kane ka dei ka dak bad ka khubor kaba shai ba ki nongialam bad ki paidbah ka Jylla kila phaikhmat sha ka NPP kum ka party bad ki ngeit ruh ha ka, ka party kaba la pyni ha kine ki saw snem shiteng ba la lah ban pyntyllun shakhmat ia ka Jylla bad kham kongsan eh ban shim iaki ishu kiba donkam bha jongu paidbah.
“Kum kine ki ishu ki dei ki bym pat ju ktah ha ki snem bala leit hynrei kane ka sorkar kala shim ia ki sienjam shakhmat bad kala tei ia ka jingshaniah jong ki paidbah”ula ong.
Haba pynpaw ba ka NPP kala ioh bha ia ka jingkyrshan na ki paidbah ka Jylla, u Conrad ula ong ba da ki spah bad hajar ngut ki briew lem bad ki nongialam sain pyrthei kila mih iala ki jong ki political party ban wan iasoh sha ka NPP,
“Nga ai khublei ia u Blei halor kane ka jingkyrkhu ba khraw ia ka party jong ngi bad nga ai khublei ruh ia ki paidbah ka Jylla Meghalaya namar ka jingngeit ba shaniah ha ka party jong ngi ba kan ialam shakhmat ia ka Jylla” ula ong.
